Afar kalt er enn í Evrópu og þegar Goðafoss, flutningaskip Eimskips, lagði úr höfn frá þýsku borginni Hamborg í dag fór það um nánast ísi lagða Saxelfi, alla vega var fljótið þakið íshröngli. Goðafoss er á leið til Helsingjaborgar og kemur í höfn í Reykjavík 14. febrúar nk. Meðfylgjandi myndir tók Ingó Herbertsson sem staddur er í Hamborg og sendi mbl.is.

Saxelfur er eitt af stærstu fljótum Evrópu og ein af helstu siglingaleiðum um Mið-Evrópu. Á vef Wikipedia segir að upptök fljótsins séu í Tékklandi, við norðurlandamæri Tékklands og Póllands. Það rennur svo 1.165 km leið um Tékkland og Þýskaland út í Norðursjó við Cuxhaven.

Mikil eftirspurn eftir rafmagni vegna kulda

Kuldinn kom ekki í veg fyrir ferð Goðafoss en hann varð til þess að Þjóðverjar ræstu í dag að nýju nokkra kjarnaofna sína, sem ákveðið var í fyrra að slökkva á. Var það gert sökum mikils álags á rafmagnskerfinu og gríðarlegrar eftirspurnar sem rekja má til kuldans. 

Búið var að slökkva á átta af sautján kjarnaofnum og stóð til að slökkva á þeim sem enn eru í gangi á árunum 2015 til 2022. Þó er gert ráð fyrir að hægt sé að nota fimm kjarnaofna ef eftirspurn á rafmagni fer fram úr framboði.