mbl.is/Ernir

Lagt er til í nýrri skýrslu að iðnaðarlögin verði endurskoðuð með gerð nýs lagafrumvarps og að löggiltar iðngreinar verði framvegis tilgreindar í iðnaðarlögum í stað reglugerðar. Þetta eru niðurstöður nefndar sem iðnaðarráðherra skipaði til að skoða hugsanlega endurskoðun iðnaðarlaga.

Nefndin hefur skilað skýrslu með tillögum sínum til ráðherra og nú fara tillögurnar í opið umsagnarferli til 19. mars.

Í tilkynningu frá iðnaðarráðuneytinu segir að nefndin leggi til að iðnaðarlögin verði endurskoðuð og að skoðað verði sérstaklega hvaða iðngreinar hafi tekið slíkum breytingum að ekki teljist lengur málefnalegar forsendur fyrir löggildingu þeirra.

Mælir nefndin í því sambandi með því að aðeins þær iðngreinar sem telja verður nauðsynlegt að veita lögverndun á grundvelli ríkra almannahagsmuna verði framvegis felldar undir flokk löggiltra iðngreina, enda felur löggilding iðngreinar í sér skerðingu á atvinnufrelsi.

Fram kemur í skýrslunni að nefndin hafi sérstaklega skoðað hvaða löggiltar iðngreinar séu kenndar á Íslandi út frá upplýsingum sem liggi fyrir um námsframboð iðngreina. Sú skoðun hafi leitt í ljós að nokkrar iðngreinar hafi ekki verið kenndar hérlendis á síðustu árum. Er þar m.a. um að ræða: Málmsteypu, mótasmíði, skipa- og bátasmíði, kæli- og frystivélavirkjun, kökugerð, feldskurð, glerslípun og speglagerð, hattasaum, hljóðfærasmíði, leturgröft, myndskurð og steinsmíði.

„Fáir hafa lokið sveinsprófi í þessum iðngreinum frá árinu 2000 og telja má líklegt að sumar þeirra séu ekki lengur til staðar í atvinnulífinu eða hafi tekið slíkum breytingum að ekki teljist lengur forsendur fyrir löggildingu þeirra. Áður en ráðist er í hugsanlegar breytingar er mikilvægt að skoðuð verði sú þekking og hæfni sem krafist er til tiltekinna iðnstarfa sem og að haft verði samráð við hlutaðeigandi stjórnvöld og alla hagsmunaaðila,“ segir í skýrslunni.

Þá leggur nefndin til að löggiltar iðngreinar verði framvegis tilgreindar í iðnaðarlögum í stað reglugerðar eins og nú er reyndin, þannig að það verði Alþingi en ekki ráðherra sem taki ákvörðun um það hvort lögvernda skuli tiltekna iðngrein.

Loks leggur nefndin til að ákvæði um eftirlit, viðurlög og kæruleiðir verði endurskoðuð.

Skýrsla nefndarinnar.