80 kannabisplöntur fundust við húsleit. Reuters

Lögreglan á höfuðborgarsvæðinu stöðvaði kannabisræktun í skrifstofuhúsnæði í Kópavogi í gær. Við húsleit á áðurnefndum stað fundust tæplega 80 kannabisplöntur, flestar á lokastigi ræktunar, og um 1,4 kg af marijúana.

Upphaf málsins má rekja til tilkynningar um vatnsleka í húsi. Sá sem tilkynnti um lekann hafði sjálfur knúið árangurslaust dyra þar sem ræktunina var að finna en viðkomandi var þess fullviss að einhver væri innandyra.

Þegar lögreglan kom á vettvang fann hún strax kannabiskeim í anddyri hússins og sömuleiðis mátti heyra umgang úr umræddu rými en þaðan lagði líka mikla kannabislykt. Farið var inn í þennan hluta hússins en þar var fyrir karl á fertugsaldri og var hann með klippur í hendinni og var að klippa niður plöntur til þurrkunar.

Ekki verður annað sagt en húsnæðið hafi verið mjög rúmgott en ræktunin, sem vó tæplega 20 kg, var bæði öflug og fullkomin. Málið telst upplýst.

Sem fyrr minnir lögreglan á fíkniefnasímann 800-5005. Í hann má hringja nafnlaust til að koma á framfæri upplýsingum um fíkniefnamál. Fíkniefnasíminn er samvinnuverkefni lögreglu og tollyfirvalda og er liður í baráttunni við fíkniefnavandann.