Frá opnun sýningarinnar í dag. Ljósmynd/utanríkisráðuneytið

Sýningin Sögueyjan Ísland - Portrett af íslenskum samtímahöfundum var í dag opnuð í húsakynnum framkvæmdastjórnar ESB í Brussel. Sýningin byggist á veggspjöldum með portrettljósmyndum Kristins Ingvarssonar og viðtölum Péturs Blöndal en báðir starfa þeir hjá Morgunblaðinu.

Sýningin er hönnuð af Matthias Wagner K og er um að ræða ljósmyndir af á þriðja tug íslenskra rithöfunda og viðtölum við þá  um hvað í íslenskum söguarfi hafi helst haft áhrif á listsköpun þeirra. Sýningin hefur verið þýdd á fimm tungumál og hafa sendiráð og bókmenntastofnanir víða um heim notað hana til kynningar á íslenskum samtímabókmenntum.

Þórir Ibsen, sendiherra Íslands gagnvart ESB, og Jan Truszczynski, framkvæmdastjóri stjórnarsviðs mennta- og menningarmála, opnuðu sýninguna. Á vef utanríkisráðuneytisins segir, að framkvæmdastjórinn hafi haft á orði að íslenskar miðaldabókmenntir væru gimsteinn innan heimsbókmenntanna og þakkað fyrir að fá tækifæri til að kynnast betur bókmenntaarflefið bókaþjóðarinnar íslensku í gegnum sjónarhorn íslenskra samtímahöfunda. Á sýningunni lágu frammi tugir íslenskra bóka sem þýddar hafa verið á ensku, þýsku og frönsku.