Ásdís Ólafsdóttir.

Ásdís Ólafsdóttir, sem átti frumkvæði að stofnun Y-lista Kópavogsbúa, segist í algjörri andstöðu við nýjan meirihluta í bænum. Hún sendir Kópavogsbúum afsökunarbeiðni. „Þetta er sorglegt,“ segir hún og hefur ákveðið að segja sig úr flokknum.

Í yfirlýsingu, sem ber yfirskriftina „Afsökunarbeiðni til Kópavogsbúa, vegna myndunar nýs meirihluta í Kópavogi“, segir Ásdís að í nýja meirihlutanum sé Y-listi Kópavogsbúa sem hún hafi átt frumkvæði að því að stofna.

„Grundvallaratriðið var að reyna að vinna eins vel og við gætum fyrir Kópavogsbúa. Í framhaldi af því voru sett grunngildi sem við öll ætluðum að starfa út frá. Þar vó þyngst siðbót í stjórnsýslu og að bæjarstjórinn yrði ópólitískur – faglega ráðinn,“ skrifar Ásdís.

 Nú hafi það gerst að Y-listinn hefur tekið „stóra u-beygju frá sínum grunngildum“, skrifar Ásdís, undir forystu sjálfstæðismanna með Ármann Kr. Ólafsson sem oddvita flokksins og hans stuðningsmanna.

Barðist á móti með kjafti og klóm

Svo segir í yfirlýsingunni:

„Ég hef reynt að berjast á móti þessu innan Y-listans með kjafti og klóm og lenti í minnihluta. Stærsti fjórflokkurinn sem virðist hafa náð yfirhöndinni, þar á meðal vegna afskipta forystunnar á landsvísu ætti að skammast sín og vona ég að kjósendur muni eftir því í næstu kosningum. Hér hafa átt sér pólitísk hrossakaup og fylgir spillingin yfirleitt á eftir með tilheyrandi kostnaði fyrir bæjarfélagið.

Ykkur Kópavogsbúa sem kusu okkur vegna okkar grunngilda vil ég biðja innilegrar afsökunar sem og aðra Kópavogsbúa sem héldu að loforð stæðu hjá stjórnmálaafli. Ég er verulega leið yfir þessu og mun segja mig af Y-listanum. Þetta er sorglegt.“