Ekki fallist á kröfu Glitnis
Glitnir mbl.is
Héraðsdómur Reykjavíkur hafnaði í dag kröfum Glitnis banka á hendur þrotabúi Fons en Glitnir krafðist þess að viðurkenndar yrðu kröfur bankans á þrotabú Fons upp á 9,6 milljarða króna.
Með úrskurði Héraðsdóms Reykjavíkur 30. apríl 2009 var bú Fons hf. tekið til gjaldþrotaskipta og skiptastjóri skipaður. Glitnir lýsti sjö kröfum í þrotabú Fons hf. alls fyrir rúmlega 23,7 miljarða króna.
Tekist var á um tvær þeirra í héraðsdómi, önnur að fjárhæð 8.346.473.718 krónur sem hafnað var að svo stöddu þar sem framlögð ljósrit samninga um hlutabréfaviðskipti voru óundirrituð af Fons hf. Hins vegar var um að ræða kröfu að fjárhæð 2.427.451.075 krónur sem var hafnað að svo stöddu þar sem skiptastjóri taldi meðal annars vanta gögn um samþykki Fons hf. á fjórum samningum um gjaldmiðlaviðskipti.
Afstaða skiptastjóra Fons var sú að vafi þætti leika á um að Pálmi Haraldsson og Guðný Reimarsdóttir, sem undirritað höfðu samningana, hefðu haft umboð til að skuldbinda félagið með þeim hætti sem leiddi af gerð umræddra samninga. Snerist því ágreiningurinn fyrir dómi nú um hvort það hafi verið réttmætt af skiptastjóra að hafna kröfum Glitnis á þeim grundvelli að Pálmi Haraldsson fyrrv. framkvæmdastjóri Fons hf. og Guðný H. Reimarsdóttir fyrrv. fjármálastjóri Fons hf. hafi ekki haft nægilegt umboð til samningsgerðar við Glitni þar sem stjórnin hafði ekki veitt heimild til framsals slíks umboðs.
Glitnir byggði meðal annars sitt mál á því að miðað við umsvif og umfang rekstrar Fons, eins og hann hafi verið á þeim tíma sem umræddir samningar hafi verið gerðir, sé ljóst að þeir hafi hvorki verið óvenjulegir eða mikilsháttar eins og haldið sé fram af þrotabúi Fons. Þegar metið sé hvort ráðstafanir séu „óvenjulegar eða mikilsháttar“ þurfi að hafa hliðsjón af tilgangi félags, umfangi og efnahagsstöðu. Það eitt að viðskiptin sem til umfjöllunar séu hafi numið verulegum fjárhæðum sé eitt og sér ekki nóg til þess að sjálfkrafa verði talið að um óvenjulega eða mikilsháttar ráðstöfun hafi verið að ræða.
„Til þess að setja hlutina í samhengi verði að skoða umfang reksturs varnaraðila og hvernig starfsemi og efnahag varnaraðila hafi verið háttað. Kaup varnaraðila á áætlunar- og leiguflugfélögum, ferðaskrifstofum, tilgreindum verslunum og Skeljungi hf., og arðgreiðslur í tengslum við eignarhlut í bresku verslunarkeðjunni Iceland sýni hvernig fjárhagslegri getu varnaraðila hafi verið háttað á árunum 2005 og 2006,“ segir í dóminum.
Ársreikningar Fons fyrir árin 2006 og 2007 hafi sýnt góða afkomu félagsins. Sala á eignum og eignarhlutum á árinu 2007 sýni fjárhagslegan styrk. Þrátt fyrir Íslandsmet í hagnaði hafi afkoma félagsins fyrir árið 2008 verið slæm en í ársreikningi Fons fyrir árið 2008 komi fram að Fons hafi verið tekinn til gjaldþrotaskipta á árinu 2009.
Samningar þeir um framvirk hlutabréfaviðskipti sem deilt var um eru allir undirritaðir fyrir hönd Glitnis banka hf. Þeir eru hins vegar ekki undirritaðir fyrir hönd Fons hf., fyrir utan einn samning sem ber undirritun Pálma Haraldssonar. Er samningurinn dagsettur 16. september 2008.
Telur dómarinn að umrædd viðskipti teljist stór og mikilvæg þar sem fjárhæð þeirra er um fjórðungur af eigin fé Fons á þessum tíma. Hvorki Pálma né Guðnýju hafi verið heimilt að skuldbinda Fons með þessum samningum vegna þessa. Er Glitni gert að greiða þrotabúinu 800 þúsund krónur í málskostnað.
