Jóhanna Sigurðardóttir svarar ekki bréfum frá SSNV vegna stöðu í atvinnu- og byggðarmálum. mbl.is/Golli

Byggðaráð Sveitarfélagsins Skagafjarðar skorar á Jóhönnu Sigurðardóttur forsætisráðherra að svara bréfum í nýlegri ályktun frá því í dag. Er forsætisráðherra ámæltur í ályktuninni fyrir að hafa ekki svarað kalli landshlutans og stjórnar SSNV um aðgerðir í atvinnu- og byggðamálum svæðisins.

Byggðaráðið fjallaði í dag um samskipti Samtaka sveitarfélaga á Norðurlandi vestra og forsætisráðuneytisins vegna bréfa sem SSNV hefur ítrekað sent forsætisráðherra, en ekki fengið svör við. Fyrra bréfið var sent 21. nóvember 2011 og fjallaði um alvarlega stöðu á Norðurlandi vestra og ósk um samstarf um sértækar aðgerðir í landshlutanum. Seinna bréfið var sent 31. janúar 2012 og var ítrekun um bréfið frá því í nóvember.

Frá Sauðárkróki. mbl.is/RAX

Bókun byggðaráðs frá því í dag er svohljóðandi:

„Skorað er á forsætisráðherra og oddvita ríkisstjórnar Íslands að svara ákalli landshlutans og stjórnar Samtaka sveitarfélaga á Norðurlandi vestra um aðgerðir í atvinnu- og byggðamálum. Stjórn SSNV hefur undanfarna mánuði ítrekað óskað eftir fundi með forsætisráðherra án árangurs til að ræða mjög erfiða stöðu byggða á Norðurlandi vestra og leggja fram tillögur til lausna á þeim vanda. Ekki er hægt að una slíkum samskiptum á milli stjórnsýslustiga og ámælisvert að æðstu ráðmenn landsins skuli koma þannig fram við heilu landshlutana. Á skömmum tíma hafa verið flutt burtu eða lögð af 45 opinber störf í Skagafirði og í ljósi nýsamþykktra fjárlaga stefnir í að fyrir árslok hafi 65 stöðugildi horfið úr héraði á árunum 2008-2012. Ábyrgð stjórnvalda er því mikil eins og þær tölur sýna og hægt að tengja fólksfækkun beint við stjórnvaldsaðgerðir sem bitnað hafa á svæðinu. Við það bætist veruleg skerðing á fjárframlögum til verkefna og þjónustu á svæðinu umfram aðra landshluta. Ekki þolir neina bið að gripið verði til aðgerða til snúa þessari þróun við með samhentu átaki stjórnvalda og heimamanna.“