Frá sjóðfélagafundi Sameinaða lífeyrissjóðsins á Hótel Nordica í kvöld. Morgunblaðið/Ómar

Þorbjörn Guðmundsson, varaformaður stjórnar Sameinaða lífeyrissjóðsins hyggst leggja til við stjórn sjóðsins að fenginn verði utanaðkomandi aðili til að fara yfir málefni sjóðsins. Einnig að fulltrúar aðildarfélaganna verði fengnir til að fara yfir þau mál sem nefnd eru í skýrslu úttektarnefndar lífeyrissjóðanna.

Þorbjörn sagði á fundi sjóðsins með sjóðsfélögum í gærkvöldi að það væri gríðarlega mikilvægt fyrir lífeyrissjóðina að atvinnulífið færi að snúast og það skapaðist tækifæri til að ávaxta fjármuni sjóðanna á skynsamlegan hátt. Ekki síður væri mikilvægt að gjaldeyrishöftum yrði aflétt sem fyrst.

Hafi stöðuna 2007 í huga

Skýrsla úttektarnefndarinnar er í megindráttum staðfesting á þeirri stöðu sem birst hefur í ársreikningum Sameinaða lífeyrissjóðsins síðustu árin, sagði Þorbjörn. 

Hann sagði að þegar staða lífeyrissjóða væri rædd, væri nauðsynlegt að hafa í huga hvað gerðist á Íslandi árið 2007 og 2008 en þá hefði verið byggð spilaborg sem hafði það að markmiði að fela eigin eitraða stöðu.

„Þessi spilaborg var svo trúverðug að Fjármálaeftirlit og Samkeppniseftirlit og Kauphöllin og Seðlabankinn létu blekkjast. Stjórnvöld spiluðu með eins og leikbrúður og lögðu áherslu á styrk íslenska bankakerfisins.“ Bankarnir hefðu staðist álagspróf erlendra matsfyrirtækja. Síðan eins og með aðrar spilaborgir hefði hún hrunið þegar eitt spilið gaf sig.

Þorbjörn sagði að til þess að lífeyrissjóðirnir hefðu átt möguleika á að brjótast í gegnum blekkingarvefinn hefðu þeir þurft að hafa miklu öflugri greiningardeildir en raun bar vitni. Jafnvel óvíst hvort það hefði dugað. Því skipti miklu máli að sjóðirnir væru sjálfstæðari þegar kæmi að greiningum.