Auður Hallgrímsdóttir, formaður stjórnar Sameinaða lífeyrissjóðsins. mbl.is/Ómar

Forsvarsmenn lífeyrissjóða voru ekki á varðbergi gagnvart gölluðum skilmálum kúlulána og hjarðhegðun einkenndi hegðun lífeyrissjóðanna þegar kom að fjárfestingum fyrir hrun. Þetta kom fram í máli Auðar Hallgrímsdóttur, formanns stjórnar Sameinaða lífeyrissjóðsins á sjóðfélagafundi  í tilefni útkomu skýrslu úttektarnefndar um starfssemi lífeyrissjóðanna stendur nú yfir á Hótel Nordica í Reykjavík.

Auður fór yfir tap sjóðsins og rakti það sem úttektarnefndin gerði athugasemdir við og til hvaða úrræða sjóðurinn hefði ákveðið að grípa.  Í skýrslu nefndarinnar kemur fram að tap sjóðsins hafi verið rúmir 25 milljarðar króna. Í máli sínu kom Auður meðal annars inn á það að óljóst hefði verið í starfsreglum sjóðsins hvenær framkvæmdastjóri ætti samráð við sjóðsstjórn, þar sem orðalagið „óvenjulegar eða mikilsháttar“ væri óskýrt og í raun háð mati hans.

Auður sagði einnig að á meðal þess sem gerðar voru athugasemdir við í skýrslunni, hefði verið fjárfestingastefna sjóðsins. Eignasamsetning hefði á sínum tíma verið ólík öðrum lífeyrissjóðum þar sem 50% voru í erlendum bréfum. Árið 2005 hefði verið ákveðið að breyta og auka hlutfall innlendrar fjárfestingar.

Auður rakti að í samskiptum við úttektarnefndina hefði komið fram það mat framkvæmdastjóra sjóðsins að hefði óbreyttri stefnu verið haldið, hefði tapið getað orðið mun minna en það varð. Samtals nam tap á skuldabréfum banka og sparisjóða, skuldabréfum fyrirtækja og innlendum hlutabréfum rúmum 24 milljörðum króna. Mest vegna innlendra hlutabréfa.