mbl.is/RAX

Héraðsdómur Reykjavíkur hefur dæmt karlmann á þrítugsaldri í 8 mánaða fangelsi fyrir að beita fyrrverandi sambýliskonu sína ofbeldi. Manninum var jafnframt gert að greiða henni 400.000 kr. í skaðabætur.

Árásin átti sér stað í íbúð mannsins í Reykjavík í október 2010. Honum var gefið að sök að hafa tekið konuna hálstaki, skellt henni utan í veggi og hrint í gólf. Allt með þeim afleiðingum að hún hlaut heilahristing, tognun á háls-, brjóst- og lendhrygg, yfirborðsáverka á hálsi og höfði, mar á vinstra augnsvæði, vinstri öxl og upphandlegg og mjóbaki.

Fram kemur í dómnum að konan og maðurinn hafi slitið sambúð sama dag og árásin var gerð.

Maðurinn neitaði sök. Hann viðurkenndi að konan hefði komið heim til sín. Hún hefði hins vegar dottið í gólfið þegar hann reyndi að beina henni út og hélt henni á lofti.

Í dómi héraðsdóms segir, að samkvæmt vætti læknis þá komi áverkarnir heim og saman við lýsingu konunnar á árás mannsins. Það sé því hafið yfir skynsamlegan vafa að maðurinn hafi veist að konunni á heimili sínu og veitt henni þá áverka er greinir í ákæru. Með því sé sannað að hann hafi skellt konunni utan í veggi og hrint henni í gólf.

Samkvæmt áverkavottorði greindist konan bæði með yfirborðsáverka og tognun á hálsi. Samrýmist það því að maðurinn hafi tekið brotaþola hálstaki, svo sem hún hafi staðhæft. Það verði lagt til grundvallar niðurstöðu. Samkvæmt þessu verði maðurinn sakfelldur samkvæmt ákæru.

Maðurinn, sem er 25 ára gamall, hefur tvívegis áður verið dæmdur til fangelsisrefsingar fyrir líkamsárás. Árið 2008 var hann dæmdur í þriggja mánaða fangelsi fyrir tvær líkamsárásir. Árið 2009 var hann svo aftur sakfelldur fyrir líkamsárás og var refsing fyrri dóms tekin upp og dæmd með því broti. Var maðurinn þá dæmdur í fjögurra mánaða fangelsi.

Héraðsdómur segir að árásin hafi verið fólskuleg og maðurinn eigi sér engar málsbætur.