Bókasafn. mbl.is/Kristinn

Stjórn Akureyrarstofu er ósátt með að sjálfsákvörðunarréttur sveitarfélaga hafi ekki verið virtur þegar breytingar voru gerðar á lögum almenningsbókasöfn. Regla um hámarkssektir komi mjög niður á Amtbókasafninu á Akureyri.

Lögunum var breytt um mitt síðasta ár og með þeim er það mennta- og menningamálaráðherra sem gefur út gjaldskrá um dagsektir og bætur fyrir afnot safnaefnis fram yfir skilafrest og að samanlagðar dagsektir fyrir afnot safnaefnis fram yfir skilafrest á hvern lánþega og bætur vegna skemmds eða glataðs safnakosts.

Ákveðið var að hafa þakið fjögur þúsund krónur óháð því hversu mikil vanskil fólks eru á bókum og öðrum safnkosti. Þetta er stjórn Akureyrarstofu óánægð með og segir í bókun síðasta fundar að það orki tvímælis að ráðherra sé ætlað að fjalla um sektir og bætur sveitarfélaga í gjaldskrá og reglugerð þar sem það samræmist ekki sjálfsákvörðunarrétti sveitarfélaga að ríkisvaldið grípi með þeim hætti inn í fjárhagsáætlanir sveitarfélaga og stofnana þeirra.

Stjórn Akureyrarstofu hvetur Alþingi jafnframt til að virða sjálfsákvörðunarrétt sveitarfélaga og taka umrætt lagaákvæði til endurskoðunar. Þá er á það bent að við framlagningu frumvarpsins á Alþingi hafi ekki verið gert ráð fyrir að lögin kvæðu á um hámark sekta og bóta.

„[S]vo virðist sem ákveðins misskilnings hafi gætt í meðförum Alþingis um að um innheimtu sekta og bóta færi samkvæmt sömu viðmiðum og um þjónustugjöld. Stjórn Akureyrarstofu telur það miður að fullrúum sveitarfélaganna hafi ekki verið gefinn kostur á að koma fyrir Alþingi til að ræða breytingarnar á frumvarpinu. Engar skýringar eru fyrirliggjandi um hvernig hámarksfjárhæðin var ákveðin,“ segir í bókun stjórnar Akureyrarstofu.