Drangeyjarfélagið er ósátt við bann á veiðum. Rax / Ragnar Axelsson

Hætta er á að aldagamlar hefðir við veiðar og eggjatöku glatist með friðun fimm tegunda svartfugls. Þetta segir stjórn Drangeyjarfélagsins í bréfi sem sent var umhverfisráðherra og öllum þingmönnum.

Starfshópur umhverfisráðherra skilaði fyrir skömmu skýrslu um verndun og endurreisn svartfuglastofna. Ein af meginniðurstöðum nefndarinnar er að friða skuli langvíu, álku, stuttnefju, teistu og lunda fyrir allri veiði næstu fimm árin auk þess sem lagt er til að eggjataka verði bönnuð í bjargi.

Í bréfi stjórnar Drangeyjarfélagsins segir að óviðunandi sé að banna veiðar á umræddum fuglum á meðan takmarkaðar upplýsingar liggja fyrir um stærð stofnanna. „Án upplýsinga verða ekki teknar vitrænar ákvarðanir. Fari svo að rannsóknir verði ekki auknar er ljóst að náttúran verður látin njóta vafans og veiðar bannaðar árum saman og þá að öllum líkindum að óþörfu. Nytjar á gæðum náttúrunnar eru eðlilegar hverju nafni sem þær nefnast.“

Þá harmar stjórnin að ekki hafi verið leitað til félagsins enda þekki þeir einna best fuglabjörgin við Ísland. „Svo virðist sem skýrsluhöfundar hafi einungis treyst þeim takmörkuðu rannsóknum sem fyrir liggja og talið ástæðulaust að afla sér upplýsinga hjá þeim mönnum sem alist hafa upp við björgin, slíkt getur vart talist til faglegra vinnubragða. Þá er sú hætta yfirvofandi að veiðar og eggjataka verði alveg bannaðar til lengri tíma og þá er stór hætta á því að aldagamlar hefðir við veiðar og eggjatöku glatist.“