Af vef Umhverfisstofunnar

Skipulagsstofnun hefur tekið ákvörðun um að eldi á allt að 200 tonnum af bleikju á ári í Galtalæk, Rangárþingi ytra, skuli ekki háð mati á umhverfisáhrifum. Fyrirtækið Íslensk matorka hefur rekið fiskeldisstöðina í Galtalæk frá árinu 2010.

Um er að ræða stækkun á fiskeldisstöðinni í Galtalæk. Eldi þar hefur verið starfrækt á grundvelli starfsleyfis fiskeldistöðvarinnar í Fellsmúla frá árinu 2000 er heimilaði 60 tonna ársframleiðslu af urriða- og laxaseiðum en þar að auki hefur verið þar eldi á bleikju. Starfsleyfið rann út í apríl 2010 en í október 2011 veitti Heilbrigðiseftirlit Suðurlands fiskeldisstöðinni í Galtalæk nýtt leyfi til framleiðslu á 20 tonnum á ári. Íslensk matorka ehf. sækist nú eftir að fá leyfi til að framleiða allt að 200 tonn af bleikju á ári.

Í gögnum framkvæmdaaðila kemur fram að gengið verði frá frárennsli á þann hátt að útilokað verði að eldisfiskur hafi samgang við villtan fisk í Galtalæk og dauður fiskur berist þangað með frárennsli frá eldisstöðinni. Ellefu fiskeldisker hafi verið notuð við eldið fram að þessu, en í fyrirhuguðum framkvæmdum verði fjögur þeirra fjarlægð og eitt langt straumker, svokallað lengdarstraumsker, verði byggt í þeirra stað. Jafnframt verður reist síló á lóð fiskeldisins og úr því verður fóðri miðlað í fiskeldiskerin.

Bleikjuseiði frá seiðaeldisstöð Íslenskrar matorku ehf. í Fellsmúla, verða alin upp í sláturstærð á Galtalæk, sem taki 8-12 mánuði. Með núverandi mannvirkjum er mögulegt að framleiða um 120 tonn af bleikju á ári. Með fyrirhuguðum endurbótum, sem m.a. gerir ráð fyrir bættri nýtingu á vatni og hreinsun á frárennsli, verður hægt að framleiða mun meira af bleikju án þess að úrgangslosun út í Galtalæk aukist eða starfsemin þurfi meira vatn til fiskeldisins miðað við það sem nú sé.

Samkvæmt 14. gr. laga nr. 106/2000 m.s.b. má kæra ákvörðun Skipulagsstofnunar til úrskurðarnefndar umhverfis- og auðlindamála (sbr. 25. gr. laga nr. 131/2011). Kærufrestur er til 12. mars 2012.