Kolsýringi dælt niður í jörðina á Hellilsheiði. mbl.is/OR

Vísindamenn og tæknimenn sem taka þátt í Carbfix-verkefninu á Hellisheiði hófu í lok janúar að dæla koltvísýringi ofan í berggrunninn við Þrengslin með því að nota nýja aðferð sem Carbfix hefur þróað.

Aðferðin felst í því að koltvísýringur er leystur upp í vatni á nokkur hundruð metra dýpi og þar hvarfast hann við basalt og myndar m.a. steintegundina kalsít.

Í umfjöllun um mál þetta í Morgunblaðinu í dag segir dr. Edda Sif Pind Aradóttir, efnafræðingur og verkefnastjóri Carbfix, það mikinn áfanga að niðurdæling á koltvísýringi sé hafin. Margra ára vinna sé að baki og búið sé að þróa alls kyns búnað og aðferðir, bæði til að dæla koltvísýringnum niður og einnig til að fylgjast með því sem er að gerast ofan í berggrunninum.

Aðferðin virkar þannig að vatni og gasi er dælt niður sínu í hvoru lagi en er síðan blandað saman á um 300 metra dýpi. Með því að leysa koltvísýringinn upp í vatni í stað þess að dæla gasinu einfaldlega niður, sé flýtt fyrir þeim efnahvörfum sem þurfi að eiga sér stað til að koltvísýringurinn bindist við basalt-berglögin.