Eldri borgarar í Reykjavík.

Ríflega helmingur Íslendinga á aldursbilinu 60-65 ára er ennþá á atvinnumarkaði. Einungis einn af hverjum fjórum Eistum og Lettum á sama aldri vinnur ennþá og á meðal Norðmanna er hlutfallið ennþá lægra. Þetta kemur fram í grein Guðrúnar Helgu Sigurðardóttur sem birtist á vef Nordic Labour Journal í gær.

Fram kemur að hlutfall 70-74 ára Íslendinga á vinnumarkaði hafi lækkað nokkuð mikið en sé engu að síður hærra en hjá norrænum frændum þeirra, í Eystrasaltsríkjum og hjá Bretum. Rétt tæplega einn af hverjum fimm Íslendingum vinnur áfram eftir sjötugt.

Í greininni segir að á Íslandi þyki mikilvægt að halda áfram að vinna fram á elliár. Mikil eftirspurn hafi verið eftir vinnuafli fyrir efnahagshrun árið 2008 og eldra fólk hafi átt í litlum vandræðum með að finna sér störf vildi það auka lífsgæði sín með því að vinna sér inn aukatekjur.

Í greininni er ennfremur vitnað til orða Vilhjálms Egilssonar, formanns SA, sem segir að efnahagshrun hafi ekki haft sérstök áhrif á stöðu eldra fólks á vinnumarkaði og eldra fólk hafi ekki misst vinnu í meiri mæli en aðrir aldurshópar. Hann segir jafnframt að samtökin hvetji atvinnurekendur til að halda í starfsmenn sína eins lengi og kostur er, óháð aldri þeirra. Hann telur ennfremur að eldri starfsmenn séu mikils metnir af íslenskum atvinnurekendum.

Jafnframt er haft eftir Jónu Valgerði Kristjánsdóttur, formanni Landssambands eldri borgara, að vinnumarkaður á Íslandi hafi breyst mikið undanfarin ár. Eldri borgurum hafi verið vel tekið og þeir hafi því unnið lengur. Hún telur þó að hugarfarsbreyting hafi átt sér stað og þeim eldri borgurum sem ekki vilji vinna fari fjölgandi. Skattahækkanir hafi komið illa niður á eldri borgurum og því borgi sig ekki lengur að halda vinnu áfram líkt og áður.

Nálgast má grein Guðrúnar hér.