Merki Kópavogs

Bæjarfulltrúar Samfylkingar og VG í Kópavogi furða sig á ummælum fyrrverandi   samstarfsfólks síns í bæjarstjórn, þeirra Rannveigar Ásgeirsdóttur og Hjálmars Hjálmarssonar í fjölmiðlum í gær og segja þau reyna að þvo hendur sínar af uppsögn bæjarstjóra Kópavogs.

Þetta kemur fram í yfirlýsingu sem bæjarfulltrúar Samfylkingar og Vinstri grænna sendu frá sér í dag.

„Á meirihlutafundi 12. janúar var Guðríði Arnardóttur falið að ganga á fund bæjarstjóra daginn eftir, föstudaginn 13. janúar, og ræða við hana um starfslok hennar. Allir sem voru á fundinum eru sammála um það að Hjálmari undanskildum, líka Rannveig sem nú reynir að víkja sér undan þessu,“ segir í yfirlýsingunni.

Við gátum ekki skilið annað á Hjálmari en að hann væri þessu líka sammála, þó svo að hann vildi ræða við bakland sitt um framhaldið, það ætluðum við líka öll að gera.
Rannveig segist aldrei hafa lýst vantrausti á bæjarstjóra en að ljóst væri að innan fyrri meirihluta hafi henni verið gert erfitt fyrir.“

„Þessi ummæli eiga sér enga stoð. Rannveig stóð að þeirri ákvörðun að fela Guðríði að ganga á fund bæjarstjóra og ræða við hana um starfslok hennar.“

Í yfirlýsingunni segir að sú fullyrðing Rannveigar að bæjarstjóra hafi verið gert erfitt fyrir innan fyrri meirihluta sé sett fram í því skyni að taka undir dylgjur um að oddviti Samfylkingarinnar hafi markvisst grafið undan bæjarstjóranum til að komast sjálf í bæjarstjórastólinn.

„Þetta er fjarri sanni. Það að bæjarfulltrúar Samfylkingarinnar geri tilkall til bæjarstjórastólsins í meirihlutasamstarfi er fyllilega eðlilegt eins og Rannveigu ætti að vera ljóst, nýbúin að krýna oddvita Sjálfstæðisflokksins.“

„Þá eru fullyrðingar Rannveigar um að enginn kostur annar hafi verið í stöðunni en að mynda meirihluta með Framsóknarflokknum og Sjálfstæðisflokknum út í hött,“ segir ennfremur í yfirlýsingunni. „Samfylkingin, Vinstri græn og Framsóknarflokkur buðu Lista Kópavogsbúa a.m.k. tvívegis í samstarf en Rannveig sýndi því engan áhuga og neitaði að taka þátt í slíkum viðræðum.“