Á vinnusvæði. Kristinn Ingvarsson

Héraðsdómur Reykjavíkur hefur sýknað Sjóvá-Almennar tryggingar hf. af kröfu manns sem taldi sig eiga rétt til bóta úr ábyrgðartryggingu Ístaks. Maðurinn slasaðist við vinnu hjá Ístaki þegar hann datt úr lausum stiga. Dómurinn taldi slysið rakið til gáleysis mannsins.

Tildrög slyssins voru þau að maðurinn, ásamt öðrum, vann að því að hífa gámaeiningar af tengivagni vöruflutningabifreiðar. Hann fór upp stiga til að festa á gáminn þar til gerða hífingarkróka, en stiginn rann undan honum og hann féll niður á pall tengivagnsins.

Samkvæmt matsgerð læknis eru varanlegar afleiðingar mannsins viðvarandi verkir í vinstri mjöðm, læri og hné, auk hreyfiskerðingar. Þá megi gera ráð fyrir ótímabærri þróun slitgigtar í hnélið. Var tímabundin óvinnufærni metin 100% frá slysdegi 7. mars 2008 til 24. mars 2010 og varanlegur miski talinn 25%.

Maðurinn fór fram á rúmar þrjátíu milljónir króna í bætur, og bar við að Ístak hefði vanrækt skyldur sínar samkvæmt lögum um aðbúnað, hollustuhætti og öryggi á vinnustöðum. Örugg áhöld hefðu ekki verið til staðar, stiginn sem hann notaði við verkið hefði verið vanbúinn og vörubifreiðapallur sem hann stóð á háll.

Í niðurstöðu dómsins segir að maðurinn sé lærður húsasmiður sem hafi starfað sem slíkur í um þrjátíu ár, m.a. sem verkstjóri á byggingarsvæðum. Þá hafi hann setið námskeið á vegum Ístaks um öryggismál, m.a. í tengslum við notkun lausra stiga.

Þá hafi verið um að ræða álstiga með grófriffluðu undirlagi sem gerði það að verkum að hann ætti ekki að renna í hálku. Því var ekki fallist á það með manninum að stiginn hefði verið vanbúinn. „Vegna menntunar stefnanda og reynslu hlaut honum að vera ljóst að hætta fylgdi því að klífa lausan stiga, eins og hann gerði í umrætt sinn. Var honum í lófa lagið að tryggja öryggi sitt með því að fá [annan starfsmann] eða ökumann vörubifreiðarinnar til að styðja við stigann, eða festa hann með öðrum hætti. Verður slysið rakið til gáleysis stefnanda og ber að sýkna stefnda af kröfum hans.“