Ekki er óalgengt að sjúkraflutningamenn aðstoði við barnsfæðingar. Mbl.is/Brynjar Gauti

Slökkviliðið á höfuðborgarsvæðinu stóð í ströngu í nótt við sjúkraflutninga og eldsútköll. Eitt útkallið var þó ánægjulegra en önnur því sjúkraflutningamenn sem kallaðir voru til að flytja konu með hríðir á fæðingardeild lentu óvænt í heimafæðingu þar sem barninu lá á að koma í heiminn.

Óskað var eftir sjúkrabíl að heimili í Reykjavík seint í gærkvöldi þar sem kona var að því komin að fæða sitt þriðja barn. Sjúkraflutningamenn drifu sig á staðinn en konan komst aldrei svo langt sem í sjúkrabílinn til að fara upp á fæðingardeild, því barnið kom í heiminn um svipað leyti og sjúkraflutningsmennirnir gengu inn um dyrnar.

Að sögn slökkviliðsins á höfuðborgarsvæðinu er ekki óalgengt að sjúkraflutningamenn taki þátt í barnsfæðingum þegar þær ganga hratt fyrir sig. Allt gekk að sögn vel í nótt og þótti ekki tilefni til að flytja mæðginin á sjúkrahús þegar allt var um garð gengið.

Þess utan var mikið annríki á næturvaktinni vegna fjölda sjúkraflutninga í nótt. Slökkviliðið var auk þess kallað þrisvar sinnum út vegna elds. Í Kópavogi kviknaði í þurrkara í kjallaraíbúð í gærkvöldi og síðar um nóttina var slökkvilið kallað til vegna elds í póstkössum í anddyri blokkar í Kópavogi. Þá kviknaði í tveimur bílum í Hafnarfirði og rannsakar lögregla hvort þar hafi verið um íkveikju að ræða.