Kristinn Ingvarsson

Mikil aðsókn er í nám í íslensku sem öðru máli við Háskóla Íslands. Hópurinn sem sækir námið hefur breyst mikið á þeim 40 árum sem boðið hefur verið upp á það; áður var það einkum menntafólk í norrænum og germönskum fræðum, en nú er hópurinn talsvert fjölbreyttari.

„Við fáum nemendur af öllu mögulegu tagi, oft er þetta fólk sem er með skínandi menntun heiman frá sér, en þarf að berjast fyrir því að fá hana metna hérna,“ segir Jón Karl Helgason, dósent og formaður námsgreinarinnar.

Hann nefnir sem dæmi menntaða ljósmóður frá Póllandi sem þyrfti að bæta við sig fimm ára háskólanámi til að fá réttindi hér á landi. „Það er algengt að útlendingum sé ýtt í láglaunastörf. Ákveðin tortryggni mætir fólki, en það er reyndar misjafnt eftir því hvaðan það kemur. En íslenskuþekking er alger forsenda þess að geta fótað sig í samfélaginu, íslenska er lykillinn,“ segir Jón Karl.

Meira en tvö hundruð nemendur víðsvegar að úr heiminum stunda á hverju ári nám í íslensku sem öðru máli við Háskóla Íslands. Jón Karl segir að hluti þeirra ílendist hér að loknu námi, aðrir halda aftur utan. Hann segir að í þessum hópi séu margir af fremstu þýðendum íslenskra bókmennta á erlend tungumál. „Þetta verða helstu sendiherrar Íslands og íslenskrar menningar og margir hafa byggt brú á milli Íslands og síns heimalands.“

„Hópurinn hefur breyst mjög mikið. Áður var þetta mestmegnis fólk sem var í námi í germönskum eða norrænum fræðum, en stærri og stærri hluti núna er fólk sem hefur flutt hingað með einhverjum hætti. Eðli námsins hefur breyst samkvæmt þessu.“

Nemendur geta valið á milli tveggja námsleiða; grunnháskólanáms, sem lýkur með BA-prófi og hagnýtrar brautar, sem ekki krefst grunnþekkingar. Nemendur í háskólanáminu þurfa aftur á móti að taka inntökupróf.

„Það er mikil aðsókn og inn á námið komast færri en vilja,“ segir Jón Karl.