Færst hefur í vöxt að hælisleitendur reyni að laumast um borð í flutningaskip í Sundahöfn. Mbl.is/Árni Sæberg

Hælisleitendurnir tveir sem teknir voru höndum í Sundahöfn í nótt þegar þeir reyndu að smygla sér til Kanada eru báðir á þrítugsaldri, fæddir 1982 og 1982. Talið er að annar þeirra sé frá Súdan og hinn frá Alsír en uppruni þeirra er þó ekki alveg ljós.

Mennirnir hafa dvalið á Fitjum, dvalarstað hælisleitenda í Reykjanesbæ. Báðir hafa þeir áður gert misheppnaðar tilraunir til að komast til Kanada um Sundahöfn og segir lögregla að þeir virðist hafa mjög einlægan ásetning um að komast héðan burt. Færst hefur í aukana að hælisleitendur reyni að gerast laumufarþegar með þessum hætti að sögn lögreglu.

Eftirlitsmenn í Sundahöfn urðu varir við mennina þegar þeir laumuðu sér inn á svæðið í nótt. Þeir komust aldrei svo langt að fara um borð í skipið eins og þeir ætluðu sér. Samkvæmt lögreglu lögðu þeir upp í ferðina með fátt annað meðferðis en fötin sem þeir stóðu í og örlítið nesti til að maula.

Ekki hefur verið tekin skýrsla af mönnunum enn en verið er að vinna að því. Að lokinni skýrslutöku verða þeir fluttir aftur að Fitjum, að sögn lögreglu.