Sjö klukkustundir á sjúkrahús

Sveitarstjórn Langanesbyggðar skorar á stjórnvöld að samþykkja ríkisábyrgð á fjármögnun framkvæmda við Vaðlaheiðargöng, svo hefja megi framkvæmdir sem fyrst.

„Fyrir skemmstu tók það sjö klukkustundir að koma sjúklingi á sjúkrahús á Akureyri eftir vinnuslys á Þórshöfn, ekki síst vegna ófærðar á Víkurskarði. Þar sem ekki var hægt að flytja hinn slasaða til Akureyrar með flugi vegna veðurs var hann því sendur af stað með sjúkrabíl. Í ljósi boðaðs niðurskurðar á sjúkrahúsinu á Húsavík er enn brýnna að greið leið sé fyrir sjúklinga til Akureyrar frá svæðunum austan Vaðlaheiðar,“ segir í tilkynningu.

Segir ennfremur í tilkynningu frá sveitarstjórninni að Vaðlaheiðargöng muni bæta búsetuskilyrði í sveitarfélögunum austan Vaðlaheiðar til muna.

„Þá mun umferðaröryggi aukast með tilkomu ganganna og aðgengi að hverskonar þjónustu, sem íbúum þessara sveitarfélaga stendur ekki til boða í heimabyggð, s.s. ýmiskonar heilbrigðisþjónustu, mun batna verulega.

Það skiptir miklu máli fyrir jaðarbyggðir á borð við Langanesbyggð að samgöngur til og frá sveitarfélaginu séu í góðu lagi. Í sveitarfélaginu er stunduð öflug útgerð og fiskvinnsla og þar fer fram mikil verðmætasköpun. Ætla má að verðmæti þeirra sjávarafurða sem framleiddar voru í Langanesbyggð á síðasta ári sé vel á sjötta milljarð króna.

Íbúum sveitarfélagsins hefur fjölgað, meðalaldur þeirra lækkað og skatttekjur á hvern íbúa hækkað umtalsvert á síðustu árum. Íbúar sveitarfélagsins þurfa aftur á móti að leggja í verulegan kostnað til að sækja ýmiskonar þjónustu sem aðrir landsmenn, einkum íbúar á suðvesturhorni landsins, telja sjálfsagða og auðfengna. Samgöngur á tímum síhækkandi eldsneytisverðs eru mjög dýrar og því situr landsbyggðin ekki við sama borð og íbúar höfuðborgarsvæðisins hvað varðar aðgengi að þessari þjónustu."

• 1 blogg um fréttina

Bloggað um fréttina

• Brynjólfur Sigurbjörnsson: Umferðaröryggi