Margir sjóðsfélagar í Sameinaða lífeyrissjóðnum kvöddu sér hljóðs og vildu skýringar. mbl.is/Ómar

„Á ekki að skipta um stjórn,“ spurði Hannes Jónsson, einn sjóðsfélaga á vel sóttum fundi sjóðsfélaga Sameinaða lífeyrissjóðsins sem haldinn var í gærkvöldi., „Ætlum við að hafa sama framkvæmdastjórann áfram?“ spurði Hannes.

Fundurinn var haldinn vegna skýrslu úttektarnefndar á starfi lífeyrissjóða. Þar kom m.a. fram að sjóðurinn hefði tapað yfir 25 milljörðum á úttektartímabilinu.

Var mörgum mikið niðri fyrir og kröfðu stjórn og framkvæmdastjóra svara um það sem kom fram í skýrslunni. Kristján Örn Sigurðsson, framkvæmdastjóri lífeyrissjóðsins viðurkenndi að það hefðu verið „algjör mistök“ á sínum tíma að kaupa víkjandi skuldabréf í Glitni á 300 milljónir. Einnig hefðu þau hjá sjóðnum mátt vera betur á varðbergi gagnvart krosseignatengslum. Þau hefðu hins vegar ekki áttað sig á því hversu mikil tengslin voru fyrr en Rannsóknarskýrsla Alþingis kom út, að sögn Kristjáns, sem hvatti til þess að komið yrði upp gagnagrunni um slík tengsl.

Í umfjöllun um fundinn í Morgunblaðinu í dag segir að fundarmenn hafi komið inn á traust og sagði einn sjóðinn rúinn trausti en annar spurði hvernig ætti að endurreisa það.