Sigmundur Davíð Gunnlaugsson, formaður Framsóknarflokksins. Eggert Jóhannesson

Sigmundur Davíð Gunnlaugsson, formaður Framsóknarflokksins, segir að ekki sé rétt að hús hafi verið rifin í borginni Bakú í Aserbaídsjan vegna byggingar Kristalshallarinnar. Hann segir að nóg sé að fara í miðbæ Reykjavíkur til að finna fólk sem búi í óvissu um nánasta umhverfi sitt og í grennd við hús sem séu látin drabbast niður.

Þetta kemur fram á bloggsíðu Sigmundar. 

„Eurovision-höllin (Kristalshöllin) í Bakú var byggð á auðri landfyllingu,“ skrifar Sigmundur. „Það er því ekki verið að rífa nein hús í miðbænum til að rýma til fyrir Eurovisionhöllinni. Hins vegar hafa miklar framkvæmdir verið í Bakú undanfarin ár og stefnt er að því að sem mestu verði lokið fyrir keppnina.“

Hann segir ótal dæmi þess á Vesturlöndum, ekki síður en í Austur Evrópu, að þensla á fasteignamarkaði og óheppileg stefna í skipulagsmálum skapi hættulega hvata sem leiða jafnvel til þess að fólk neyðist til að selja heimili sín til niðurrifs.

Í því sambandi nefnir hann Skuggahverfið.

„Það er t.d. afleitt hvernig farið hefur verið með Skuggahverfið í Reykjavík, fyrst með skipulaginu frá 1983 og svo með gríðarlegum niðurrifs og byggingaráformum uppúr aldamótum sem urðu til þess að íbúar sem gert höfðu upp hús í hverfinu hröktust burt,“ skrifar Sigmundur.

„Enn sér ekki fyrir endann á slíkri óheillaþróun í Skuggahverfinu og víða í miðbæ Reykjavíkur. Víða býr fólk við óvissu um nánasta umhverfi sitt og í grennd við hús sem látin eru drabbast niður og eyðileggjast vegna óskynsamlegrar stefnu í skipulagsmálum.“

Bloggsíða Sigmundar Davíðs Gunnlaugssonar