Búið er að skoða um 100 konur sem eru með PIP-púða. JUAN CARLOS ULATE

Rúmlega 100 konur sem erum með PIP-brjóstapúða eru búnar að koma í ómskoðun hjá Krabbameinsfélaginu. Um 65% þeirra eru með leka púða. Af þeim konum sem komu í skoðun í þessari viku er hlutfall þeirra sem eru með leka púða talsvert lægra en meðal þeirra sem komu í síðustu viku.

Krabbameinsfélag Íslands hefur tekið að sér að sjá um ómskoðanir vegna kvenna sem eru með PIP-brjóstapúða, en talið er að um 440 konur séu með þessa púða. Þessar skoðanir eru gerðar á fimmtudögum og föstudögum.

Í fyrstu vikunni var 41 kona skoðuð. Niðurstaðan var sú að 34 konur greindust með leka púða, fimm voru með heila púða en tvær kvennanna þurfa nánari skoðun. Þetta þýðir að yfir 80% voru með leka púða.

Jón Baldursson, starfandi landlæknir, sagði að eftir þær ómskoðanir sem gerðar voru í þessari viku væri hlutfallið komið niður í 65%.

Landspítalinn er byrjaður að taka á móti konum sem búnar eru að fara í skoðun hjá Krabbameinsfélaginu. Jón sagði ekki komið í ljós hversu margar konur ætluðu að þiggja boð um að láta fjarlægja brjóstapúðana sér að kostnaðarlausu. Hann sagði enga bráðavá af þessum púðum, en nauðsynlegt væri að vinna áfram að því að leysa vanda þessara kvenna.