Rauði kross Íslands hefur sent neyðarstyrk sem nemur tveimur milljónum króna til aðstoðar fórnarlömbum kuldabylgjunnar í Hvíta-Rússlandi en frost í landinu hefur farið niður fyrir þrjátíu gráður á síðustu vikum.

Þá var heill gámur af hlýjum fatnaði sem sjálfboðaliðar á Íslandi hafa safnað og prjónað sendur af stað til Hvíta-Rússlands í gær og munu þau föt nýtast um 12.500 manns. Samskonar fatagámur var einnig sendur til landsins á haustmánuðum og kemur sá fatnaður fjölda fólks að góðum notum í frosthörkunum núna.

Miklar frosthörkur og snjókoma hafa verið í landinu síðari hluta janúarmánaðar og fór frost niður í allt að 32 gráður í byrjun febrúar. Veðurspá gerir ráð fyrir áframhaldandi frosthörkum nú um helgina og mikilli kuldatíð út febrúarmánuð. Fimm manns hafa þegar orðið úti í Hvíta-Rússlandi og á annað hundrað manns hafa verið fluttir á sjúkrahús vegna kals.

Öllum fatnaði og teppum sem fer frá Íslandi til Hvíta Rússlands er dreift af sjálfboðaliðum og starfsfólki Rauða krossins þar í landi sem auk þess býður heimilislausum og þeim sem minna mega sín heitar máltíðir og aðra aðstoð í upphituðum neyðarskýlum. Neyðarsjóður Alþjóða Rauða krossins hefur nú þegar styrkt Rauða krossinn í Hvíta-Rússlandi um sem samsvarar tæpum 13 milljónum króna og er styrkurinn frá Íslandi hluti af þeirri upphæð, segir í tilkynningu.