Jón Sigurðsson

112-dagurinn verður haldinn um allt land í dag, laugardaginn 11. febrúar. Markmið dagsins er að kynna neyðarnúmerið og þá margvíslegu aðstoð sem almenningur hefur aðgang að í gegnum það.

Að þessu sinni er áhersla lögð á að hvetja fólk til að hika ekki heldur hringja í 112 ef það telur sig þurfa á aðstoð að halda – til öryggis. Efnt er til dagskrár í Smáralind og hjá viðbragðsaðilum um allt land. 112-dagurinn er haldinn víða um Evrópu á sama tíma en 112 er samræmt neyðarnúmer í löndum Evrópusambandsins.

Starfsemin verður kynnt í Smáralind klukkan 11-17 í dag. Klukkan 14 verður stutt athöfn í göngugötunni þar sem Ögmundur Jónasson innanríkisráðherra flytur ávarp, skyndihjálparmaður ársins verður útnefndur, verðlaun í Eldvarnagetrauninni verða afhent og neyðarvörður ársins útnefndur. 

Almenningi gefst kostur á að ræða við starfsfólk og sjálfboðaliða í Smáralind í dag, skoða fjölbreyttan tækjakost lögreglu, slökkviliðs, Landhelgisgæslunnar og björgunarsveita og spreyta sig á endurlífgun.

Í Smáralind stendur einnig yfir ljósmyndasýningin Útkall 2011. Á henni er úrval ljósmynda frá verkefnum viðbragðsaðila á síðasta ári.

112-dagurinn er samstarfsverkefni stofnana og félagasamtaka sem annast margvíslega neyðarþjónustu, almannavarnir og barnavernd í landinu, en þau eru:112, Barnaverndarstofa, Embætti landlæknis, Isavia, Landhelgisgæslan, Landspítalinn, Landssamband slökkviliðs- og sjúkraflutningamanna, Mannvirkjastofnun, Rauði krossinn, Ríkislögreglustjórinn, Slysavarnafélagið Landsbjörg, Slökkvilið höfuðborgarsvæðisins og samstarfsaðilar um allt land.

Dagskrána í dag má nálgast á vefsíðu Landsbjargar