mbl.is

Nokkuð erilssamt var hjá lögreglunni á höfuðborgarsvæðinu í gærkvöldi og í nótt. Meðal verkefna lögreglu voru hassreykingar unglinga, akstur gegn rauðu ljósi, afskipti af fjölda gesta á skemmtistöðum og árás á leigubílstjóra.

Ökumaður var staðinn að því að aka gegn rauðu ljósi á Kringlumýrarbraut á tólfta  tímanum í gærkvöldi.  Í ljós kom að bifreiðin var ótryggð og voru númer tekin af henni.

Lögregla kom að fjórum unglingum í Gvendargeisla um hálfttólfleytið í gærkvöldi, sem virtust vera við kannabisreykingar. Við leit fannst hassblandað tóbak.  Málið var afgreitt á vettvangi. Vegna aldurs var haft tal af forráðamönnum sem og barnavernd látin vita.

Rétt eftir miðnætti var tilkynnt um eld í húsi við Lönguhlíð.  Lögregla og slökkvilið voru send á staðinn og í ljós kom að um eld í etanolarni var að ræða. 

Rétt eftir klukkan eitt sást til þekkts fíkniefnaaðila á veitingahúsi við Laugaveg.  Haft var tal af honum og fannst við leit fíkniefni.  Málið var afgreitt á vettvangi.  Um svipað leyti var bifreið stöðvuð á Eiríksgötu.  Ökumaður var grunaður um ölvun við akstur.  Hann var færður á næstu lögreglustöð þar sem málið var afgreitt. 

Um klukkan hálftvö var bifreið stöðvuð á Menntavegi.  Ökumaður var grunaður um akstur undir áhrifum vímuefna og einnig vöknuðu grunsemdir um sölu fíkniefna.  Efni fundust við leit og var það mál afgreitt á staðnum.  Ökumaðurinn var færður á næstu lögreglustöð.

Rétt eftir klukkan fjögur var tilkynnt um bifreið sem hafi ekið inn í garð við Fagrahjalla og síðan af vettvangi.  Hafði bifreiðinni verið ekið utan í skilti og girðingu.  Vitað er hvaða bifreið þetta er og hver eigandi er.  Bifreiðin fannst við hús eiganda með leifar af vettvangi hangandi utan á henni.  Ekki tókst að ná sambandi við eiganda bifreiðarinnar. 

Á fimmta tímanum var gerð könnun á starfsmannamálum og fjölda gesta á veitingastað við Bergstaðastræti.  Kom í ljós að ýmsu var ábótavant, s.s. merkingu dyravarða og fjölda gesta inni á staðnum.  Málið mun verða tekið fyrir í vikunni. 

Bifreið var stöðvuð á Brávallagötu rétt fyrir klukkan fimm og ökumaður hennar grunaður um ölvun við akstur.  Færður á næstu lögreglustöð og málið afgreitt samkvæmt reglum þar um. Skömmu síðar var karlmaður handtekinn á Laugavegi grunaður um fíkniefnavörslu.  Hann heimilaði leit og fundust efni á honum.  Málið var afgreitt á vettvangi. 

Um hálfsexleytið var bifreið stöðvuð á Miklubraut, ökumaður reyndist réttindalaus og grunaður um akstur undir áhrifum vímuefna. Hann var fluttur á næstu lögreglustöð.

Um svipað leyti óskaði leigubifreiðastjóri eftir aðstoð í Steinási.  Þar hafði farþegi ráðist á hann eftir að hann reyndi að komast hjá að greiða gjaldið.  Þá mun hann og einnig hafa brotið rúðu í anddyri heima hjá sér.  Leigubifreiðarstjórinn hyggst kæra hann fyrir líkamsárás sem og fjársvik.