Golli / Kjartan Þorbjörnsson

Ekki ætti að væsa um skíðaáhugafólk fyrir norðan og austan í dag, því skíðasvæðin á Dalvík, í Hlíðarfjalli á Akureyri og Oddsskarði verða opin í dag.

Hlíðarfjall verður að öllum líkindum opið í dag frá kl. 10-16. Þar hefur verið nokkuð hvasst í morgun en forsvarsmenn skíðasvæðisins telja að veður muni ganga niður og munu athuga með opnun klukkan tíu.

Opið er á skíðasvæðinu í Oddsskarði  í dag frá kl. 10 til 16. Ágætisveður er á svæðinu, að sögn forsvarsmanna skíðasvæðisins, V 4ms, léttskýjað og tveggja stiga frost. Líf og fjör verður hjá Austfirðingum, en 12 ára og yngri keppa í svigi og stórsvigi.

Átta ára og yngri keppa í leikjabraut með þrautum. Heimamenn segja nóg pláss er fyrir alla í fjallinu þó að snjór hafi minkað í hlákunni undanfarnar vikur.

Einnig verður opið í Böggvisstaðafjalli við Dalvík frá 11.00 til 16.00.  Þar er töluvert vindasamt. Staðarhaldarar segja að vind muni lægja þegar líður á daginn, en hvetja þó fólk til að hringja á undan sér.

Þeir sem hyggja á skíðaferðir eru hvattir til að hafa samband við skíðasvæðin áður en lagt er af stað.