Kolaportið mbl.is

Tollstjóri hyggst slökkva á eftirlitsmyndavélum á húsi embættisins við Tryggvagötu á meðan Kolaportið er opið. Þetta kemur fram í umsögn Persónuverndar um fyrirhugaða vöktun hússins.

Í umsögninni segir að hún sé almenns eðlis og feli ekki í sér efnislega afstöðu Persónuverndar til lögmætis vinnslu. Hún sé því ekki bindandi berist Persónuvernd kvörtun manns sem vaktaður hefur verið af tollstjóra.

Þá segir: „Hvergi er í lögum gert ráð fyrir því að tollstjóri vakti með rafrænum hætti ferðir fólks á almannafæri. Á honum hvílir ekkert það lögboðið hlutverk er geri honum slíka vöktun heimila eða nauðsynlega.“

Þó er tekið fram að tollstjóra geti verið heimilt að hafa myndavélar utan á húsnæði embættisins, en til þess þarf meðal annars að takmarka sjónarhorn eftirlitsmyndavélanna þannig að það beinist að húsinu sjálfu en ekki verði um að ræða vöktun fólks á almannafæri. Er sérstaklega minnst á innganginn að Kolaportinu.

Þá er einnig minnst á skyldu tollstjóra til að gera aðvart um myndavélarnar. „Þegar rafræn vöktun fer fram á vinnustað eða á almannafæri, skal gera glögglega viðvart um vöktunina og hver sé ábyrgðaraðili. Það má gera með því að setja upp merki eða setja vel sýnileg skilti utan á hús embættisins.“