„Stærstu verðlaunin eru heima“
Gísli Örn Gíslason, skyndhjálparmaður ársins 2011 og dóttir hans, Sigurbjörg Jóhanna Gísladóttir. mbl.is/Júlíus Sigurjónsson
„Það hjálpaðist allt að á þessum degi. Það var röð tilviljana sem olli því að við vorum öll heima. Við erum búin að vera að rifja þetta upp og það var svo margt ótrúlegt sem gerðist,“ segir Gísli Örn Gíslason, sem í dag var valinn skyndihjálparmaður ársins 2011 af Rauða krossi Íslands. Hann bjargaði lífi 18 ára gamallar dóttur sinnar í fyrra.
Gísli sýndi hárrétt viðbrögð á neyðarstundu þegar dóttir hans, Sigurbjörg Jóhanna Gísladóttir, fór í hjartastopp á heimili þeirra hinn 29. janúar 2011. „Ég var að spjalla við hana, hún sat með tölvuna í fanginu. Allt í einu var eins og það væri slökkt á Sigurbjörgu, höfuðið seig út á vinstri hliðina.“
Hélt að hún væri að grínast
Gísli hélt fyrst að hún væri að grínast en áttaði sig fljótt að ekki var allt með felldu og að hjarta hennar hafði stöðvast. Hann kallaði á eiginkonu sína að hringja í sjúkrabíl, tók dóttur sína niður á gólf og hóf strax endurlífgun.
„Ég var snöggur að leggja hana í gólfið og byrjaði að hnoða. Við hringdum í 112, konan mín hélt símanum upp á eyranu á mér og ég fékk leiðbeiningar þangað til sjúkrabíllinn kom.“
Sjúkraflutningamenn og lögreglumenn komu á staðinn 7-8 mínútum eftir hringt var í 112. Þeir gáfu Sigurbjörgu stuð sem kom hjarta hennar aftur af stað og var hún í kjölfarið flutt á sjúkrahús.
Gísli starfar í álverinu í Straumsvík og hefur farið þar reglulega á skyndihjálparnámskeið. Hann segist vita fleiri dæmi þess að starfsmenn álversins hafi bjargað mannslífum, þar sem skyndihjálparkunnátta þeirra hefur komið að gagni, og segist vita til þess að einn þeirra hafi bjargað litlu barni.
„Maður veit aldrei í hverju maður getur lent. En þegar eitthvað svona kemur upp á hjálpar það manni svo gríðarlega að kunna eitthvað. Maður heldur miklu fremur ró sinni. Ég átti aldrei von á því að þurfa að nota þessa kunnáttu heima hjá mér, en svo var ég allt í einu þarna með barnið mitt í höndunum.“
Gerði mitt besta
Gísli segist ekki hafa haft ráðrúm til að hugsa um hvort hann væri hræddur eða ekki. „Ég gerði bara mitt besta, þetta er frekar í móðu. En við höfum fengið að heyra símtalið okkar við 112 og þá rifjaðist ýmislegt upp.“
Hann segir Sigurbjörgu hafa verið um þrjá mánuði að ná sér eftir þetta.
Spurður að því hvaða þýðingu verðlaunin í dag haf svarar Gísli því til að þau séu vel til þess fallin að vekja fólk til umhugsunar. „En stærstu verðlaunin eru hérna heima. Dóttir mín er núna með okkur.“
Gísli tók við viðurkenningu Rauða krossins í göngugötunni í verslunarmiðstöðinni Smáralind kl. 14.00 í dag á hátíðardagskrá Neyðarlínunnar og samstarfsaðila um 112-daginn.
Skyndihjálparmaður valinn í 11. sinn
Þetta er í ellefta sinn sem Rauði krossinn velur skyndihjálparmann ársins. Viðurkenninguna hlýtur sá einstaklingur sem hefur á árinu veitt skyndihjálp á eftirtektarverðan hátt. Sérstök dómnefnd sker úr um hver hlýtur viðurkenninguna ár hvert en hana skipa fulltrúar frá Rauða krossi Íslands, Slysavarnafélaginu Landsbjörg, Neyðarlínunni, Landspítala háskólasjúkrahúsi, lögreglunni, og Landssambandi slökkviliðs- og sjúkraflutningamanna.
Tilgangur tilnefningarinnar er ekki síst að hvetja aðra til að læra skyndihjálp og vera þar af leiðandi hæfari til að veita aðstoð á vettvangi slysa og áfalla. Í flestum tilfellum þegar beiting skyndihjálpar hefur bjargað lífi fólks gerist það við aðstæður sem eru hluti af daglegu lífi. Oftar en ekki er það einhver nákominn sem þarf á aðstoð að halda.
Fimm aðrir fá viðurkenningar
Fimm aðrir einstaklingar hljóta einnig viðurkenningar hjá deildum Rauða krossins fyrir að hafa beitt skyndihjálp og bjargað lífi á eftirtektarverðan hátt.
Þeir eru Íris Grönfeldt kennari og dóttir hennar Anna Þórhildur Gunnarsdóttir, en Íris endurlífgaði móður sína með aðstoð Önnu Þórhildar eftir að hún lenti í blóðþrýstingsfalli og fór í hjartastopp á heimili sínu í Borgarnesi; Theodór Fannar Eiríksson, sem slökkti eld í móður sinni með teppi og vatni eftir sprengingu í etanólarni á heimili þeirra; Vilhjálmur Vernharðsson, björgunarsveitarmaður og bóndi í Möðrudal á Fjöllum, sem endurlífgaði tékkneska ferðakonu sem fór í hjartastopp á tjaldstæðinu við bæinn; og Þorgrímur Ómar Tavsen stýrimaður sem endurlífgaði skipsfélaga sinn eftir að hann fór í hjartastopp úti á sjó.
