Bræðurnir Snorri og Guðlaugur Rafnssynir við löndun á Ólafsvík á 7,5 tonnum sem fengust í 30 net. mbl.is/Alfons

Í vikunni gerðist það að ýsa seldist fyrir hærra verð en þorskur á fiskmörkuðum. Á miðvikudag voru seld 17,7 tonn af óslægðri ýsu og var meðalverðið 349 krónur á kíló. Af þorski voru seld 37,7 tonn og fengu kaupendur hann á 340 kr hvert kíló að meðaltali. Í gær var ýsan seld á um 280 krónur en þorskurinn á rúmlega 300 krónur.

Í Morgunblaðinu í dag kemur fram, að það sé sjaldgæft að meira fáist fyrir ýsuna heldur en þorskinn, en helsta skýringin á þessu er sú hversu bágbornar aflaheimildir margra eru í ýsunni. Örn Pálsson, framkvæmdastjóri Landssambands smábátaeigenda, segir ekki eftir neinu að bíða með að auka ýsukvótann.

„Fjölmargir bátar eru nú þegar búnir með ýsukvótann og ómögulegt að fá ýsu leigða. Reyndar binda menn vonir við skiptimarkaðinn sem er í gangi hjá Fiskistofu, en það bjargar ekki öllu. Þorskur og ýsa eru um allt, en það er mjög erfitt að veiða þorskinn eingöngu. Vísindamenn og þeir sem stjórna þessu virðast hins vegar eiga erfitt með að skilja að bátarnir geta ekki farið út og veitt bara þorsk. Ýsukvótinn er ekki háður aflareglu og aukning kvóta kæmi ekki niður á stofninum.“