Lögerglan á höfuðborgarsvæðinu handtók í nótt mann, sem var að selja fíkniefni við veitingahús í borginni en maðurinn var með fíkniefni í söluskömmtum innanklæða. 

Lögreglumennirnir gerðu í kjölfarið húsleit á heimili mannsins og fundu talsvert magn kannabisefna. Þá var hald lagt á fé sem talið er að sé ágóði af sölu fíkniefna ásamt mælitækjum og pökkunarbúnaði.

Lögreglan segir að óeinkennisklæddir lögreglumenn hafi kannað ástandið á skemmtistöðum borgarinnar og gestum þeirra nú um helgina líkt og gert sé reglulega.  Nokkrir, sem lögreglumenn höfðu afskipti af, voru með fíknefni í fórum sínum og einhverjir höfðu ekki með aldur til veru á stöðunum en með skilríki sem sögðu til um annað. Lögreglan segir, að í þeim tilfellum þegar einstaklingur hafi ekki náð 18 ára aldri sé haft samband við foreldra sem geti sótt börn sín á lögreglustöðina og séu slík brot tilkynnt barnaverndarnefnd.

Í tilkynningu frá lögreglu segir að mælanleg fækkun hafi orðið á ofbeldisbrotum í kringum skemmtanir um  helgar í miðborginni miðað við árin á undan og megi ætla að virkt eftirlit lögreglu með veitingahúsum og gestum eigi þar sinn þátt. Þá sé gott samstarf við starfsfólk og dyraverði veitingahúsanna.

Það sé tilfinning lögreglumanna, sem sinna þessum málaflokki, og dyravarða að þetta eftirlit hafi fælt sölumenn fíkniefna í einhverjum mæli frá þessum stöðum.