Ekið var á manninn í Austurstræti. Ernir Eyjólfsson

Tveir menn voru handteknir á heimili annars þeirra á sjötta tímanum í morgun vegna gruns um að annar hvor þeirra hefði ekið á mann í Austurstræti á fimmta tímanum. Mennirnir gista fangageymslur og verða yfirheyrðir þegar líður á daginn.

Samkvæmt upplýsingum frá lögreglu barst tilkynning um kl. 4.30 frá manni sem sagði að ekið hefði verið yfir rist á fæti sínum í Austurstræti. Ekki tókst að hafa uppi á bifreiðinni en þar sem skráningarnúmer hennar lá fyrir fór lögregla á heimili skráðs eiganda. Þar voru tveir menn og voru báðir handteknir vegna gruns um að hafa ekið bifreiðinni.

Þá var á sjötta tímanum í morgun ökumaður stöðvaður á Vesturlandsvegi við Úlfarsfell. Sá hafði ekki réttindi til aksturs og var auk þess á ótryggðum bíl. Lögreglumenn klipptu því númerin af bílnum og fer mál mannsins sína leið í réttarkerfinu.

Ennfremur var ökumaður stöðvaður í Fellsmúla á níunda tímanum. Hann er grunaður um að hafa ekið undir áhrifum vímuefna. Hann var færður á lögreglustöð þar sem tekin var blóðprufa og málið afgreitt. Auk þess að vera undir áhrifum, reynist svo vera, verður hann kærður fyrir að aka án ökuréttinda, vörslur fíkniefna og fyrir að vera með ólöglegan hníf, þ.e. vopnalagabrot.