Rauðar rósir eru eftirsóttar um þessar mundir.

Anna Lilja Þórisdóttir
annalilja@mbl.is

„Þetta er frekar mikill annatími hjá blómabændum,“ segir Sveinn A. Sædal, formaður Sambands garðyrkjubænda, en tveir miklir blómasöludagar eru á næstu grösum; Valentínusardagurinn á morgun og konudagurinn næstkomandi sunnudag. 

Hann segir margfalt meira seljast af blómum fyrir konudaginn en Valentínusardaginn og að verið sé að kaupa mismunandi blóm fyrir dagana tvo. Eftirspurn eftir rósum er í hámarki um þessar mundir, bæði hér heima og annars staðar, fyrst og fremst vegna Valentínusardagsins.

Rautt og bleikt fyrir Valentínusardaginn

„Fólk kaupir fyrst og fremst rauð og bleik blóm fyrir Valentínusardaginn, en svo er allur gangur á því hvað keypt er á konudaginn. Það eru bæði karlar og konur sem gefa blóm á Valentínusardaginn. Það er mjög algengt að kaupa eitt blóm; eina rauða eða bleika rós, en aftur á móti eru gjarnan keyptir stórir blómvendir á konudaginn. Karlarnir vilja gjarnan vera djarfir og gefa fallega og stóra blómvendi,“ segir Sveinn.

Hann segir að ólíku sé saman að jafna með bóndadaginn og konudaginn, því að þegar konur kaupi blóm handa mönnum sínum séu þær talsvert hagsýnni í innkaupum og kaupi smáa vendi.

Íslensk blóm um 80%

Að sögn Sveins eru um 80% blóma á íslenskum markaði ræktuð hér á landi og hann segir að blómabændur undirbúi sig fyrir þessa miklu blómasöludaga með því að skipuleggja ræktun sína þannig að það verði kúfur í uppskerunni á þessum tíma.

En er það ekkert slæmt fyrir viðskiptin að þessir tveir dagar skuli vera með svona stuttu millibili? „Nei, ég held ekki, því að fólk er ekki að kaupa eins blóm fyrir þessa daga. Reyndar geta stundum verið allt að tvær vikur á milli konudagsins og Valentínusardagsins. En það hefur reyndar gerst að öll blóm hafa selst upp um þetta leyti,“ segir Sveinn.