Um helmingur allra fjárfestinga sveitarfélaganna er hjá Reykjavíkurborg. mbl.is/Rax

Sveitarfélögin ætla að fjárfesta fyrir 12,7 milljarða á þessu ári, en það er minna en þau fjárfestu fyrir á síðasta ári. Í Fréttabréfi Hag- og upplýsingasviðs Sambands íslenskra sveitarfélaga segir að þetta sé áhyggjuefni með tilliti til atvinnulífs í landinu og atvinnustigsins almennt.

Miðað við fjárhagsáætlanir sveitarfélaganna fyrir þetta ár verður ekki annað séð en að sveitarfélögin stefni að lækkun skulda á árinu í heildina litið. Samkvæmt nýjum sveitarstjórnarlögum mega skuldir sveitarfélaga ekki vera umfram 150% af heildartekjum. Þau fá 10 ár til að aðlaga sig þessu markmiði.

Samkvæmt fjárhagsáætlunum sveitarfélaganna ætla þau að fjárfesta samtals fyrir 12,7 milljarða. Þar af er um helmingur hjá Reykjavík sem er verulega umfram hlutdeild borgarinnar í heildaríbúafjölda landsins. Þessi fjárhæð er nokkuð lægri en fram kemur í útkomuspá ársins 2011. Í henni eru fjárfestingar metnar nálægt 14,3 milljörðum. „Það vekur ákveðnar áhyggjur því samdráttur í fjárfestingum hefur veruleg áhrif á atvinnulífið og atvinnustig,“ segir í fréttabréfinu.

Hafa ekki öll tryggt sér lánsfé

Ný lántaka sveitarfélaganna er áætluð 10,9 milljarðar samtals. Hlutfallslega er lánataka mest hjá Reykjavíkurborg. Þar á móti er áætlað að greiða niður langtímalán um 15,5 milljarða. Þegar allt hefur verið stillt saman þá er eftir að afla sem nemur tæplega 3,9 milljarða til að uppfylla fjárþörf ársins. Það á við um öll sveitarfélög utan Reykjavíkur en í Reykjavík er staða fjármögnunarhreyfinga jákvæð. Aftur á móti er staða fjármögnunarhreyfinga neikvæð hjá „sveitarfélögum á höfuðborgarsvæðinu utan Reykjavíkur“ og á „vaxtarsvæðum“.

„Staða fjármögnunarhreyfinga gefur til kynna hvort sveitarfélög hafa náð að uppfylla fyrirsjáanlega fjárþörf í fjárhagsáætlun eða ekki. Þar sem fjármögnun er neikvæð er ljóst að ekki liggur fyrir hvernig eigi að fjármagna fyrirsjáanlegar fjárfestingar og / eða afborganir lána. Því má síðan ekki gleyma að vegna efnahagsástandsins er ekki tryggt að öll sveitarfélög nái að uppfylla lánsfjárþörf sína á árinu,“ segir í fréttabréfinu.
3. Efnahagsreikningur

Heildarskuldir og skuldbindingar sveitarfélaganna nema samtals um 257,6 milljörðum króna. Skuldbindingar sem voru áður utan efnahags eru nú komnir inn í efnahagsreikning. Þær eru samtals að fjárhæð nálægt 45 milljörðum króna. Þar var um að ræða samninga við fjármögnunarfyrirtæki sem eru til komnir annaðhvort vegna nýbygginga eða sölu og endurleigu fasteigna.