Umboðsmaður skuldara

Dæmi eru um að fjármálafyrirtæki neiti lántaka um gögn er snúa að uppgjöri eða dragi svo vikum eða mánuðum skiptir að afhenda honum umbeðin gögn. Þetta kemur fram í svari efnahags- og viðskiptaráðherra við fyrirspurn þingmanns Framsóknarflokks.

Þingmaðurinn, Gunnar Bragi Sveinsson, spurði hvort banki eða önnur lánastofnun sem endurreiknað hefur lán, t.d. ólöglegt gengislán, geti neitað að afhenda viðskiptavini gögn sem sýna hvernig útreikningurinn var gerður.

Í svari ráðherra segir, að í lögum um fjármálafyrirtæki sé ekki að finna ákvæði sem mæla með skýrum hætti fyrir um rétt viðskiptamanna fjármálafyrirtækja til að fá aðgang að gögnum er varða viðskipti þeirra við fjármálafyrirtæki. Þó sé það mat Fjármálaeftirlitsins að viðskiptamenn eigi sjálfir rétt á þeim upplýsingum sem þeir geta veitt þriðja aðila.

Þá er vitnað í svar frá umboðsmanni skuldara, en þar kemur fram að gögn sem nauðsynleg eru til að yfirfara aðferð við endurútreikning lána séu upprunalegur lánasamningur og yfirlit yfir greiðslur á viðkomandi láni. Í sumum tilvikum þar sem lán eru að hluta til í íslenskum krónum sé jafnframt nauðsynlegt að fá íslensku vaxtaröðina, þ.e. þá íslensku vexti sem voru á láni hjá lántaka yfir allan lánstímann. Umboðsmaður fer fram á að viðkomandi gögnum sé svarað.

Í svari umboðsmanns kemur jafnframt fram að það komi fyrir að skuldari hafi ekki gögn undir höndum og fjármálafyrirtæki neiti lántaka um gögn er snúa að uppgjöri eða dragi svo vikum eða mánuðum skiptir að afhenda skuldara umbeðin gögn. "Í slíkum tilvikum hefur umboðsmaður kallað eftir slíkum gögnum frá fjármálafyrirtækjum, yfirfarið útreikninga í heild og sent skuldara bréf um þá aðferð sem fjármálafyrirtæki beitir, niðurstöðu útreikninga og gögn í máli viðkomandi." Þá segir að fjármálafyrirtæki bregðist jákvætt við ósk embættisins um afhendingu gagna þrátt fyrir að gjarnan sé litið á fjögurra daga frest frekar sem undantekningu en meginreglu.