Össur Skarphéðinsson. Reuters

Þingmaður Framsóknarflokks gerði á Alþingi í dag athugasemdir við orðalag svars utanríkisráðherra við skriflegri fyrirspurn um Evrópustofu. Fór þingmaðurinn fram á að svarið yrði tekið til sérstakrar skoðunar. 

Meðal þess sem Vigdís Hauksdóttir, þingmaður Framsóknarflokks, spurði um, var hvers vegna utanríkisráðuneytið hefði samið við stækkunardeild Evrópusambandsins um að opna hér Evrópustofu.

Svar Össurar Skarphéðinssonar utanríkisráðherra var tekið til umræðu á Alþing þegar Siv Friðleifsdóttir, þingmaður Framsóknarflokks, kvaddi sér hljóðs undir liðnum fundarstjórn forseta og undraðist mikið orðalag svarsins. Sagðist hún telja að Össur hefði sjálfur skrifað þetta og vildi að forsætisnefnd tæki málið fyrir.

Svarið er orðrétt á þessa leið:
„Fyrirspurnin byggist á misskilningi sem raunar hefði mátt uppræta með því að leita til Evrópustofu. Rangt er að ráðuneytið hafi samið við einn eða neinn um Evrópustofu. Slíkri ósk var aldrei, formlega eða óformlega, komið á framfæri við Evrópusambandið. Hér er því rangur hattur settur á ráðuneytið, líkt og þegar Jón Hreggviðsson setti upp hatt böðulsins í Galtarholti forðum. Allt frumkvæði að Evrópustofu kom frá Brussel, eins og ýmislegt gott sem eflt hefur hag Íslands.“

Vigdís spurði einnig hvort tilgangurinn með Evrópustofu væri ekki að vinna að aðild að Evrópusambandinu. Össur svaraði því til að þetta væri einnig á misskilningi byggt hjá Vigdísi. Hann vísaði í útboð ESB en þar kemur fram að tilgangurinn sé að aðstoða Evrópusambandið við að auka þekkingu og skilning á Evrópusambandinu á Íslandi og til að varpa ljósi á tengsl Íslands og ESB, samningaferlið sjálft og mögulegar afleiðingar aðildar fyrir Íslendinga.

Þá er spurt um stöðugildi vegna Evrópustofu og segir í svarinu að fimm störf hafi skapast við Evrópustofu, þrjú í fullu starfi og tvö í hlutastarfi. Reksturinn fyrsta árið kosti  um 113 milljónir króna.