Jón Eiríksson í Fagranesi hefur nytjað Drangey í áratugi. Hann hefur farið með fjölda ferðamanna út í eyjuna. Morgunblaðið/Einar Falur

„Að okkar mati er friðun þessara fuglategunda á öllu landinu allt of harkaleg aðgerð, einkum þegar horft er til þess hversu takmarkaðar rannsóknir liggja að baki tillögunni.“

Þetta segir í bréfi sem Drangeyjarfélagið í Skagafirði hefur sent alþingismönnum. Í bréfinu er tillögum starfshóps umhverfisráðuneytisins um algera friðun fimm svartfuglastofna harðlega mótmælt.

Umhverfisráðherra hefur kynnt á vef sínum drög að frumvarpi til breytingar á lögum um vernd, friðun og veiðar á villtum fuglum og spendýrum. Þar er gert ráð fyrir að nýting tiltekinna hlunninda sé leyfisbundin. Frumvarpið er liður í að framfylgja tillögum starfshóps ráðuneytisins um að friða tímabundið fimm tegundir sjófugla, þar á meðal lunda.

Í umfjöllun um mál þessi í Morgunblaðinu í dag kemur fram, að félagar í Drangeyjarfélaginu setja spurningarmerki við forsendur tillagna starfshópsins. „Ég sé ekki að það séu vísindaleg rök á bak við þetta veiðibann. Ég hef ekki hitt nokkurn mann sem telur að stofninum hafi hrakað hér,“ segir Viggó Jónsson, formaður Drangeyjarfélagsins. Hann er í hópi manna sem lengi hafa sigið eftir eggjum í björgum Drangeyjar og háfað lunda. Hann nefnir lundastofninn sem dæmi, segir að varp hafi verið í góðu meðallagi í fyrra. „Maður spyr sig, af hverju á að banna veiðar hér fyrir Norðurlandi, þegar lægð er í stofninum á Suðurlandi,“ segir Viggó. Hann nefnir fleiri eyjar, meðal annars Vigur í Ísafjarðardúpi þar sem lunda hefur verið að fjölga.