Hjálmar Hjálmarsson bæjarfulltrúi í Kópavogi Árni Sæberg

Hjálmar Hjálmarsson, fulltrúi Næstbesta flokksins í bæjarstjórn Kópavogs, segist ekki hafa haft umboð þeirra sem standa að framboðinu til að halda samstarfi áfram með Samfylkingu, Vinstri-grænum og Y-lista Kópavogsbúa. Þá segist hann ekki geta borið ábyrgð á að meirihlutaviðræður annarra gengu ekki upp.

Í yfirlýsingu frá Hjálmari, sem hann segir senda út vegna umræðu um myndun nýs meirihluta Sjálfstæðisflokks, Framsóknarflokks og Y-lista Kópavogsbúa, segir að hann hafi ekkert haft með myndun nýs meirihluta að gera. Hann hafi ekki beitt áhrifum sínum á nokkurn hátt svo hann yrði myndaður og beri þar enga ábyrgð.

Hann segist hins vegar bera ábyrgð á að upp úr samstarfi fráfarandi meirihluta slitnaði. „[Á]stæður þess voru óheilindi fulltrúa gamla meirihlutans, alvarlegur trúnaðarbrestur og mikil óánægja með þau vinnubrögð sem viðhöfð voru í tengslum við uppsögn bæjarstjórans. Þá var gróflega farið á bak við fulltrúa NæstBestaFlokksins í afar veigamiklum málum. Undirritaður hafði auk þess ekki umboð þess fólks sem stendur að framboði NæstBestaFlokksins til að halda samstarfinu áfram.“

Að endingu tekur Hjálmar fram, að hann geti ekki axlað ábyrgð á því að Framsóknarflokkur, Y-listi og Samfylkingin komu sér ekki saman um myndun meirihluta fyrir rúmum þremur vikum og enn síður að Samfylkingin í bandalagi við VG náði ekki samkomulagi við Sjálfstæðisflokkinn um myndun meirihluta sem reynt var síðar.