Pálína R. Kjartansdóttir. mbl.is/RAX

Pálína R. Kjartansdóttir er níræð í dag og mjög heilsugóð en hún þakkar það breyttu mataræði sem hún kynntist þegar hún fór á Heilsuhæli NLFÍ í Hveragerði árið 1958. Hún hafði fram að því verið mjög veik í maga.

Pálína helgaði starfsævi sína matreiðslu heilsufæðis aðallega úr jurtaríkinu, en hún vann í rúm 32 ár á Heilsustofnun NLFÍ sem ráðskona.

Í samtalsgrein í Morgunblaðinu í dag kemur fram, að hún er einnig frumkvöðull í gerð uppskrifta að heilsufæði og skrifaði tvær matreiðslubækur í anda náttúrulækningastefnunnar. Hún segist hafa byggt uppskriftir sínar mikið á því sem hún lærði á Skodsborg í Danmörku árið 1960 en Pálína telur að þar hafi hún fyrst Íslendinga farið til útlanda að læra matreiðslu heilsu- og grænmetisfæðis. Pálín er einstaklega ern, keyrir bíl, stundar göngur, hefur gott minni, góða sjón og heyrn, spilar brids og fer í vatnsleikfimi. Hún eldar mest sjálf og kaupir íslenskt hráefni.