Niðurstaðan er sú að 47 prósent landsvæðisins teljast þjóðlendur en 53 prósent eignarland. Morgunblaðið/Rax

Óbyggðanefnd hefur þegar úrskurðað um 70 prósent af landinu öllu og 86 prósent af miðhálendinu. Niðurstaðan er sú að 47 prósent landsvæðisins teljast þjóðlendur en 53 prósent eignarland. Af þeim hluta miðhálendisins sem búið er að úrskurða um eru 89 prósent svæðisins þjóðlendur en 11 prósent teljast eignarland. Þetta kemur fram í svari forsætisráðherra við fyrirspurn Sigmundar Ernis Rúnarssonar, þingmanns Samfylkingarinnar, um þjóðlendur.

Nánar tiltekið hefur óbyggðanefnd úrskurðað um svæði sem nær frá Suðvesturlandi til Hornafjarðar og frá Norðausturlandi til vestanverðs Norðurlands. Eftir er að úrskurða á Austfjörðum, Norðvesturlandi, Vesturlandi og Vestfjörðum.

Sigmundur spurði einnig um notkun ríkisins á þjóðlendunum. Í svari ráðherra segir að í samræmi við samþykkt ríkisstjórnarinnar frá 31. maí sl. um Auðlindasjóð og gjaldtöku fyrir nýtingarrétt var sett á fót nefnd um stefnumörkun ríkisins í auðlindamálum. Nefndinni er ætlað að taka á þáttum sem lúta að ráðstöfun nýtingarréttar sameiginlegra auðlinda og ýmissa réttinda sem ríkið ræður yfir, umsýslu þessara réttinda og meðferð tekna sem hún skapar. Nefndinni var ætlað ljúka störfum 1. desember sl. en vegna umfangs verkefnisins var starfstími hennar framlengdur til 1. júlí 2012.

Auk þessa hefur forsætisráðuneytið sent erindi til Orkustofnunar og óskað eftir samstarfi um kortlagningu þeirrar nýtingar sem á sér stað á köldu vatni, heitu vatni á lághitasvæðum auk nýtingar háhitasvæða í þjóðlendum. Jafnfram var óskað eftir því að stofnunin ynni tillögur að því hvernig best væri að haga verðlagningu fyrir nýtingu þessara auðlinda. Gert er ráð fyrir að vinnu Orkustofnunar verði lokið fyrir 1. maí nk.