Miklar vonir eru bundnar við ferðaþjónustu sem atvinnuskapandi grein í dag. Golli / Kjartan Þorbjörnsson

Miklar vonir eru bundnar við ferðaþjónustu sem atvinnuskapandi grein í dag og margir sjá þar ljósið í myrkrinu við núverandi  ástand í atvinnumálum. Mjög mikilvægt er að huga að gæðum og öryggi í greininni og hvernig hægt er að auka jákvæðan starfsanda og vinnugleði og skapa fyrirtækjum forskot með öflugu fræðslustarfi.

Þann 16. febrúar nk. halda Samtök ferðaþjónustunnar ráðstefnu sem nefnist „Dagur menntunar í ferðaþjónustu“ á Hilton Reykjavík Nordica en þar mun athyglin beinast að mikilvægi stjórnandans, símenntun og fræðslu starfsfólks.

 Til ráðstefnunnar hefur m.a. verið  boðið þremur fyrirlesurum; Tony Donohoe, fræðslustjóra IBEC – Irish Business and Employers Confederation sem eru systursamtök SA á Írlandi og Hrund Gunnsteinsdóttur, Krád Consulting sem mun fjalla um mikilvægi skapandi og gagnrýninnar hugsunar í menningu fyrirtækja. Jafnframt mun Helmut Kronika, framkvæmdastjóri BEST í Austurríki, fjalla um innleiðingu náms í farsímum (mobile learning) á Íslandi.

 Í lok ráðstefnunnar verður Starfsmenntaviðurkenning SAF afhent því fyrirtæki sem þykir skara fram úr í greininni. Katrín Jakobsdóttir, mennta- og menningarmálaráðherra, mun afhenda viðurkenninguna. Starfsmenntasjóðirnir Starfsafl, Landsmennt og SVS styrkja ráðstefnuna og munu sjóðirnir og fræðsluaðilar í ferðaþjónustu jafnframt kynna starfsemi sína í kaffihléi.