mbl.is / Hjörtur

Hæstiréttur dæmdi í dag EA fjárfestingarfélag hf., sem áður hét MP banki, til að greiða Íslandsbanka tæplega 317 milljónir vegna sölu á hlutabréfum í Landsbankanum skömmu fyrir hrun.

Málavextir eru þeir að árið 2006 tók Hansa ehf., sem var félag í eigu Björgólfs Guðmundssonar, lán hjá Sparisjóði vélstjóra. Lánsupphæðin var 2,5 milljarðar króna. Í framhaldinu gerði sparisjóðurinn samning við MP banka um aðild að samningnum, en bankinn tók að sér að lána einn milljarð af lánsupphæðinni.

2. og 3. október seldi MP banki hlutabréf í Landsbankanum fyrir samtals 528 milljónir. Gera átti upp viðskiptin 7. og 8. október en 6. október tók Fjármálaeftirlitið ákvörðun um að stöðva tímabundið viðskipti á skipulegum fjármálamarkaði og daginn eftir tók FME bankann yfir.

Íslandsbanki, sem eignaðist á síðasta ári Byr, áður Sparisjóð vélstjóra, krafðist þess að sér yrði greiddur hluti andvirðis hlutabréfa sem MP banki hf. hafði selt og Byr hafði fengið að veði til tryggingar á láni til Hansa ehf. Hæstiréttur féllst á að EA fjárfestingarfélagi hf., sem áður hét MP banki, bæri að greiða Íslandsbanka hluta söluandvirðisins í samræmi við hlutdeild síðarnefnda félagsins í lánssamningnum, enda bæri að líta á það sem afrakstur innheimtuaðgerðar í skilningi samnings félaganna sín á milli.