Nótaskipin Finnur fríði frá Götu í Færeyjum og Aðalsteinn Jónsson SU 11 frá Eskifirði á siglingu á Lónsbugt fyrir nokkrum dögum. mbl.is/Börkur

Útlit er fyrir að yfirstandandi loðnuvertíð geti orðið sú besta síðan veturinn 2004-5. Má ætla að útflutningsverðmæti loðnunnar geti numið hátt í 30 milljörðum króna. Er þá reiknað með að allur kvóti íslenskra skipa upp á tæp 554 þúsund tonn veiðist og að auki um 40 þúsund tonn sem koma í hlut Íslendinga af óveiddum kvóta annarra aðila.

„Allt þarf að ganga upp til að þetta verði að veruleika; veiðar, vinnsla í sem verðmætastar afurðir og sala á mörkuðum,“ segir Friðrik J. Arngrímsson hjá LÍÚ, í umfjöllun um loðnuvertíðina í Morgunblaðinu í dag.

Á vertíðinni 2010-2011 veiddu íslensk skip um 322 þúsund tonn og voru útflutningsverðmæti loðnuafurða á síðasta ári um 18 milljarðar.  Samkvæmt bráðabirgðatölum Fiskistofu var í gær búið að landa tæpum 270 þúsund tonnum á vertíðinni sem mátti byrja 1. október en þar sem mikið hefur verið landað síðustu daga og tölur berast kerfi Fiskistofu ekki samdægurs, má reikna með að loðnuaflinn nálgist 300 þúsund tonn.