Jarðvarmavirkjanir eru lengir að borga sig. mbl.is/Rax

Ef leigutími orkuauðlinda verður styttur kemur það óhjákvæmilega niður á arðsemi virkjana. Ef tíminn verður styttur niður í 20-25 ár munu mjög fáir virkjanakostir hér á landi standast arðsemiskröfur. Þetta segir Daði Már Kristófersson, dósent í auðlindahagfræði við Háskóla Íslands.

Daði flutti erindi í dag á aðalfundi Samorku þar sem hann fjallaði um gjaldtöku, leigutíma og arðsemi orkunýtingar.

Daði segir að arðsemi virkjana hér á landi sé lítil þar sem lögð hafi verið megináhersla á lágt raforkuverð frekar en arðsemi orkufyrirtækjanna. Virkjanir hér á landi séu lengi að borga sig, sérstaklega jarðvarmavirkjanir. Leigutíminn þurfi að ná yfir endurgreiðslutímabil fjárfestingar. Mikil stytting á leigutímanum spilli því fyrir arðsemi virkjana.

Daði segir að hann sé ekki stjórnmálamaður og vilji því ekki svara því hversu langur leigutíminn eigi að vera. Aðalatriði sé að menn viðurkenni að stytting leigutíma sé kostnaðarsöm og hafi það í huga þegar ákvarðanir séu teknar.

Í umræðunni hafa sumir talað um að rétt sé að fara með leigutímann niður í 20-25 ár. Daði segir að fáir virkjanakostir hér á landi þoli svo stuttan tíma. Of stuttur leigutími hindri annars arðbærar framkvæmdir.

Daði segir mjög hæpið að ætla sér að stytta leigutímann og taka upp auðlindagjöld fyrir nýtingu á raforku á sama tíma. Stuttur leigutími geri orkufyrirtækjunum enn erfiðara að greiða auðlindagjöld.

Daði segir of stuttan leigutíma hindra arðbærar framkvæmdir auk þess sem langur leigutími vinni gegn svokölluðum leigjendavanda, þar sem skammtímahagsmunir leigutaka séu aðrir en langtímahagsmunir leigusala.