Börn eiga að vera í viðurkenndum öryggisbúnaði í bílum.

Lögreglan á Suðurnesjum hafði afskipti af ökumanni við leikskóla fyrir nýliðna helgi. Í framsæti bílsins var einn fullorðinn farþegi, með lítið barn laust í fanginu. Hefði bíllinn lent í árekstri eða ökumaður þurft að nauðhemla af einhverjum ástæðum hefðu afleiðingar getað orðið mjög alvarlegar fyrir barnið, segir í tilkynningu frá Umferðarstofu.

Eins og flestir vita eiga börn að vera í viðeigandi öryggisbúnaði í bílum sem hæfir þyngd þeirra. Hægt er að finna upplýsingar um það á heimasíðu Umferðarstofu: www.us.is.

Ökumaðurinn reyndist ekki vera með ökuskírteini og við athugun kom í ljós að hann hafði misst ökuréttindi fyrir nokkrum árum, en látið hjá líða að taka próf að nýju til að endurheimta þau. Ökumaðurinn á von á kæru og lögregla sendir almennt skýrslu um slík mál til yfirvalda barnaverndarmála, sem síðan ákveða hvort og þá til hvaða aðgerða sé rétt að grípa.
Í niðurstöðum könnunar á notkun öryggisbúnaðar fyrir börn, sem Umferðarstofa og fleiri hafa gert árum saman víða um land, hafa átt sér stað miklar framfarir í notkun öryggisbúnaðar og til dæmis nutu tæplega 90% þeirra barna, sem ástandið var kannað hjá á Suðurnesjum, í könnun síðastliðið vor fullnægjandi öryggisbúnaðar.