mbl.is/Heiddi

Vinnumálastofnun hefur sent sveitarfélögum á Suðurlandi erindi þar sem óskað er eftir því að atvinnulausir fái frían aðgang að sundlaugum sveitarfélaganna. 

Grímsnes- og Grafningshreppur hefur hafnað erindinu þannig að atvinnulausir komast ekki frítt í sund á Borg. Þá hefur byggðaráð Rangárþins ytra einnig hafnað því að atvinnulausir fái frían aðgang að sundlauginni á Hellu og á Laugalandi í Holtum, samkvæmt frétt dfs.

Byggðaráð Rangárþings bókaði eftirfarandi: „Nauðsynlegt er að koma atvinnulausu fólki til hjálpar með að leita sér að vinnu og efla það í þeirri viðleitni. Sveitarstjóra og formanni atvinnu- og menningarmálanefndar er falið að bjóða fulltrúa frá Vinnumálastofnun Suðurlands í heimsókn í sveitarfélagið til að fara yfir stöðuna.

Þar sem lægstu laun í samfélaginu eru svipuð og atvinnuleysisbætur sér hreppsráð sér ekki fært að veita gjaldfrjálsan aðgang að sundlaugum fyrir einn hóp umfram annan. Hreyfing er öllum holl, sama hvort það á við um fólk í föstu starfi eða atvinnulausa, og bendir hreppsráð Vinnumálastofnun á að snúa sér til velferðarráðuneytisins með erindið,“ segir í frétt dfs.