Færri fara í tæknifrjóvganir
Biðlistarnir hjá ART Medica hafa styst verulega frá áramótum eftir að hætt var að niðurgreiða fyrstu meðferð. Ásdís Ásgeirsdóttir
„Okkur finnst þetta vera mikið óréttlæti,“ segir Sonja Lind Eyglóardóttir um að hætt sé að niðurgreiða fyrstu meðferð við tæknifrjóvgun hjá barnlausum pörum og einhleypum barnlausum konum. Guðmundur Arason hjá ART Medica segir biðlista hafa styst mikið síðan breytingin tók gildi um áramótin.
Sonja Lind segir breytinguna sérstaklega ósanngjarna gagnvart fólki með lág laun. Því sé gert nær ómögulegt að komast í þessa fyrstu meðferð sem nú kosti tæpar 400 þúsund krónur með lyfjakostnaði. Hún hefur hrundið af stað undirskriftasöfnun þar sem Guðbjartur Hannesson velferðarráðherra er hvattur til að draga breytingarnar til baka.
Áður fyrr niðurgreiddu Sjúkratryggingar Íslands (SÍ) þriðjunginn af kostnaðinum. Í kjölfar reglugerðar velferðarráðuneytisins sem tók gildi 1. janúar hefur kostnaðurinn við glasafrjóvgun farið úr 250.311 kr. í 376.055 kr. hjá ART Medica, einu læknamiðstöðinni hér á landi sem sérhæfir sig í frjósemisvandamálum. Þurfi barnlaus pör og einhleypar konur á fleiri meðferðum að halda greiða SÍ 65% af kostnaði fyrr aðra, þriðju og fjóru meðferð. Þá kostar glasafrjóvgunin 171.721 kr.
Sonja stefnir á að fara í sína fyrstu glasafrjóvgun á þessu ári. Maðurinn hennar er námsmaður og hafa þau því ekki mikinn pening á milli handanna. „Þegar ferðakostnaður er tekinn með í reikninginn ásamt gistingu o.fl. þá er kostnaðurinn orðinn hátt í 600 þúsund kr.,“ segir hún en að meðaltali eru rúmlega 30% líkur á að fyrsta meðferð heppnist. „Þetta er í hrópandi ósamræmi við það sem er að gerast á hinum Norðurlöndunum,“ bætir hún við og bendir á að í Noregi greiði fólk aðeins lyfjakostnaðinn af tæknifrjóvgunarmeðferðum og í Danmörku, Svíþjóð og Finnlandi geti fólk farið í allt að þrjár tæknifrjóvganir fyrir aðeins brot af því sem það kostar hér á landi.
Guðmundur Arason, kvensjúkdómalæknir hjá ART Medica, segir þessa breytingu velferðarráðuneytisins hafa haft áhrif á þann fjölda fólks sem leitar til læknamiðstöðvarinnar. „Eftir að reglugerðin tók gildi hefur biðlistinn styst mikið. Nú er tveggja mánaða biðlisti en hann var áður fjórir til fimm mánuðir. Þetta hefur haft mikið að segja.“
Hann segir að sér þyki leitt hvað fari lítið fyrir þessu máli hjá stjórnarandstöðunni og að enginn þingmaður hafi tekið þetta mál fyrir. Fyrir nokkrum árum hafi hliðstæðar breytingar verið gerðar í Danmörku og var stjórnarandstaðan þar mjög gagnrýnin á þær. Þegar stjórnarskipti urðu voru breytingarnar nær umsvifalaust dregnar til baka og tryggt að tæknifrjóvganir yrðu niðurgreiddar sem áður.
„Það er erfitt fyrir marga að þurfa að borga fullt verð fyrir fyrstu meðferð. Það vantar gagnrýni stjórnarandstöðunnar í þessu og það er eins og þetta mál hafi dottið upp fyrir vegna allrar umræðunnar um skuldamál o.fl.,“ segir Guðmundur að lokum.
