Við beinum því til skuldugra heimila og einstaklinga sem telja á sér brotið, að beina þeim málum í réttan og eðlilegan farveg, segir í tilkynningu frá Samtökum lánþega. mbl.is/Golli

Samtök lánþega fordæma þann atburð er átti sér stað er ráðist var á starfsmann Dróma hf. á heimili hans. Enginn einstaklingur á að þurfa að óttast um öryggi sitt og fjölskyldu sinnar, starfs síns vegna, segir í tilkynningu frá samtökunum sem Guðmundur Andri Skúlason, talsmaður þeirra, skrifar undir.

„Við beinum því til skuldugra heimila og einstaklinga sem telja á sér brotið, að beina þeim málum í réttan og eðlilegan farveg. Ofbeldi og hatur er ekki sá farvegur.

Við þurfum á því að halda nú, að allir aðilar máls geti og vilji tala saman um þá stöðu sem nú er komin upp varðandi uppgjör lána. Við erum nálægt lausn og við erum nálægt endamarki. Árásir sem beinist gegn fjármálafyrirtækjum eða starfsmönnum þeirra, hjálpa ekki í göngu okkar að settu marki.

Það er eitt að gagnrýna störf og stefnu fyrirtækis, en annað að ráðast gegn friðhelgi einkalífs og heimilis.

Hatur er versti óvinur góðs málstaðar og ofbeldi er versti óvinur farsælla lausna. Stöndum saman. Flöggum málefnum, rökum og umræðu. Vinnum okkur til lausna, með friðsömum hætti,“ segja Samtök lánþega í tilkynningu.