Gísli Páll Pálsson

Í grein sl. laugardag vakti ég athygli á að hár lyfjakostnaður einstaklinga sem væntanlegir eru á hjúkrunarheimili ylli því að þeir ættu síður möguleika á að komast inn en aðrir, segir Gísli Páll Pálsson, forstjóri og formaður Samtaka fyrirtækja í heilbrigðisþjónustu, í Mbl. í dag. Svo virðist sem greinin hafi hreyft við velferðarráðherra og er það vel, segir Gísli.

Gísli kemur víða við í grein sinni, segir m.a. frá því að eitt hjúkrunarheimili á Íslandi hafi sérstöðu með þessi lyfjamál en það er Sóltún sem tók til starfa árið 2002. Í samningi Sóltúns við ráðuneytið (þá heilbrigðisráðuneyti) er ákvæði á þann veg að „ef lyfjakostnaður einstaklings fer yfir eðlileg frávik frá meðaltali tekur verkkaupi (ráðuneytið) þátt í greiðslu heildsöluverðs fyrir viðurkennd lyf sem hafa fengið markaðsleyfi hér á landi eða heilbrigðisyfirvöld hafa heimilað notkun á".

Grein Gísla má lesa í heild í Morgunblaðinu í dag en í niðurlagi hennar segir hann: „Það er endalaust hægt að rökræða með hvaða hætti þessi mál hafa verið í gegnum tíðina og hvernig og hverjir hafi reynt að leysa þau. Aðalatriðið er að þau verði leyst með sómasamlegum hætti sem allra fyrst, þeim sem nota þessi dýru lyf til hjálpar. Ef sú lausn kostar það að vera kallaður siðleysingi og óhæfur stjórnandi af velferðarráðherra, þá er það alveg þess virði".